مولانا آزاد نیشنل اردو یونیورسیٹی کواتر پردیش میں اراضی کی فراہمی

ظفر سریش والا یوپی کے وزیراعلیٰ یوگی آدتیہ ناتھ کے ساتھ: فوٹو کریڈٹ: ماریہ شکیل
ظفر سریش والا یوپی کے وزیراعلیٰ یوگی آدتیہ ناتھ کے ساتھ: فوٹو کریڈٹ: ماریہ شکیل

ظفر سریش والا کے ساتھ ملاقات میں وزیر اعلیٰ آدتیہ ناتھ کا وعدہ،مدارس کی تجدید کاری پر بھی غور
لکھنئو(معیشت نیوز) حیدرآباد میں واقع مولانا آزاد نیشنل اردو یونیورسیٹی کو اترپردیش کے دارالحکومت لکھنئو میں اس کے کیمپس کے لئے یوگی حکومت جلد ہی زمین فراہم کر سکتی ہے۔ یونیورسیٹی کے چانسلر ظفر سریش والا نے گزشتہ ہفتہ وزیر اعلیٰ یوگی آدتیہ ناتھ سے ملاقات کر یونیورسیٹی کے کیمپس کے لئے زمین کی مانگ کی تھی جس کا وزیر اعلیٰ نے مثبت جواب دیا تھا۔ سریش والا کو وزیر اعظم نریندر مودی کا دست راست سمجھا جاتا ہے۔ظفر سریش والا کو 2015 میں اردو کے فروغ کے لئے قائم مولانا آزاد نیشنل اردو یونیورسیٹی کا چانسلر بنایا گیا تھا۔
سریش والا نے معیشت ڈاٹ اِن سے گفتگو کرتے ہوئے کہاکہ’’اس سے قبل کبھی کسی نے یونیورسٹی کے لیے کوئی مانگ نہیں کی جس کا نتیجہ ہے کہ کسی نے کبھی زمین الاٹ کرنے کی بات بھی نہیں کی۔اب اس گذارش کے بعد معاملات میں بہتری کی امید ہے اور ہم امید کرتے ہیں کہ جب ایک فارمل درخواست یونیورسٹی کے طرف سے جائے تو اس پر کارروائی ہوگی‘‘۔واضح رہے کہ آدتیہ ناتھ کے ساتھ ملاقات میں دیگر مسائل کے علاوہ مدارس کی تجدیدکاری اور اترپردیش مدرسہ تعلیمی بورڈ کو مضبوط کئے جانے پر تبادلہ خیال ہوا۔ اترپردیش میں سرکاری امداد یافتہ اڑتالیس ہزار مدارس ہیں، تاہم سابقہ حکومتوں کی جانب سے متعدد بارکی گئی کوششوں کے باوجود زمینی حقیقت میں کوئی تبدیلی نہیں آئی ہے۔
اب چونکہ وزیر اعلیٰ اپنی مسلم مخالف شبیہ کو ایک ایسے منتظم کار میں بدلنے کے لئے کوشاں ہیں جو سب کے لئے کام کرتا ہو، یونیورسیٹی کے لئے زمین کی فراہمی سے متعلق ان کے اس اقدام سے ان کی شبیہ بہتر ہو سکتی ہے اور مسلمانوں میں اس کا ایک اچھا پیغام جا سکتا ہے۔

Leave a Reply

Your email address will not be published. Required fields are marked *