ممبرا کے وفا پارک میں معیشت فیسٹ2018 کے انعقاد کا فیصلہ

معیشت فیسٹ بینر

قرب و جوار کے اسکول و کالج کے طلبہ و طالبات کی شرکت کو یقینی بنانے کی کوشش
ممبرا(معیشت نیوز) مہاراشٹرضلع تھانے کےمسلم اکثریتی علاقہ کوسہ ممبرا میں معیشت اکیڈمی کی جانب سے معیشت فیسٹ کے انعقاد کا فیصلہ کیا گیا ہے جس میں قرب و جوار کے اسکول و کالج کے طلبہ و طالبات کی شرکت کو یقینی بنانے کی کوشش کی گئی ہے۔ معیشت اکیڈمی کی انچارج شرمین طاہر انصاری کے مطابق ’’اس وقت اسکول و کالج میں تعلیم اپنے اختتامی مراحل میں ہے جبکہ نئے تعلیمی سال کا آغاز ہوا چاہتا ہے۔بچوں کے اندر جہاں یہ خواہش موجزن ہے کہ وہ اچھے نمبرات سے پاس ہوں وہیں وہ ان سرگرمیوں میں بھی شامل ہونا چاہتے ہیں جو ان کی صلاحیتوں کو جلا بخش سکے۔لہذا یہ وہ وقت ہے کہ جب طلبہ وطالبات کی رہنمائی کی جائے اور انہیں بہتر مستقبل کے لئے تیار کیا جائے‘‘۔
شرمین طاہر انصاری کے مطابق’’ مذکورہ فیسٹ میں جہاں تحریر و تقریر کے ساتھ سیرت و قرات کا مقابلہ رکھا گیا ہے وہیں اس بات کی کوشش کی گئی ہہے کہ موضوعات ایسے منتخب کئے جائیں جو موجودہ حالات سے مطابقت رکھتے ہوں ۔لہذا درختوں کی حفاظت پر جہاں ڈرائنگ رکھی گئی ہے وہیں انٹرنیٹ کی تباہ کاریوں پر تقریری مقابلہ رکھا گیا ہے‘‘۔
واضح رہے کہ ادارہ معیشت گذشتہ کئی برسوں سے فائنانشیل لٹریسی پر کام کر رہا ہےجبکہ معیشت کے منیجنگ ڈائرکٹر دانش ریاض سرکاری و غیر سرکاری اداروں کے مختلف علمی کاموں میں شامل رہے ہیں۔حکومت مہاراشٹر کی ہائی لیول محمود الرحمن کمیٹی جس نے ریاست کے مسلمانوں کی تعلیمی، سماجی ،اقتصادی معاملات پر اپنی تحقیقی رپورٹ پیش کی تھی اس میں بھی دانش ریاض پیش پیش رہے ہیں۔
شرمین انصاری کہتی ہیں کہ ’’دانش ریاض کی انتھک کوششوں کا نتیجہ ہے کہ ہم معیشت اکیڈمی کو بہتر طور پر قائم کرنے میں کامیاب ہوئے ہیں اور بہتر تعلیم سے طلبہ و طالبات کو مزین کر رہے ہیں۔مذکورہ فیسٹ جہاں ہماری حوصلہ افزائی کا سبب بنے گا وہیں ہم اپنے متعلقین تک یہ پیغام بھی پہنچا سکیں گے کہ ہم نے اب تک کس طرح کی تعلیم دی ہے اور کس اسٹینڈرڈ تک اپنے بچوں کو لے جانا چاہتے ہیں‘‘۔