نمازخبری موبائل ایپ لانچ ، مساجد کمیٹی بھوپال نے کی پہل

موبائل ایپ کو اردو،ہندی اورانگریزی میں بھی کیاجاسکتاہےسرچ
بھوپال :بھوپال مساجد کمیٹی نے ائمہ وموذنین کی تنخواہوں میں اضافہ کولےکر صوبائی حکومت کو نیا پرپوزل بھیجاہے۔ اسی کے ساتھ کمیٹی نے شہر کی مساجد میں ہونے والی نماز کے اوقات کو جاننے کے لئے ’’نمازخبری ‘‘کے نام سے موبائل کو لانچ کیاہے۔ بھوپال کونوابوں کی نگری کے ساتھ مساجد کابھی شہرکہاجاتا ہے۔ اس شہر میں مساجد کی کثرت اتنی ہے کہ دنیا میں مساجد کی کثرت میں اس کا نام تیسرے نمبر پر آتا ہے ۔شہر میں پانچ سو نوے مساجد ہیں جس میں ایشیا کی بڑی مسجد تاج المساجد بھی شامل ہے۔ مساجد میں اول وقت میں نمازکیسے پڑھی جائے اور شہر میں باہر سے آنے والے اشخاص کو مساجد میں نماز کے اوقات کا علم کیسے ہواس کے لئے مساجد کمیٹی کے ذریعہ بھوپال میں شہر قاضی کے ہاتھوں موبائل ایپ کو لانچ کیا گیاہے۔مساجد کمیٹی کے ذریعہ نماز خبری کے نام سے لانچ کئے گئے اس موبائل ایپ کو اردو،ہندی اور انگریزی میں بھی سرچ کیاجاسکتا ہے۔ مساجد کمیٹی ریاست بھوپال کی مساجد کا انتظام دیکھتی ہے واضح رہے کہ مختلف میڈیا رپورٹوں کے ذریعہ مساجد کمیٹی کے زیر اہتمام ائمہ وموذنین کی خستہ حالی کے معاملے کو پیش کیاگیا تھا جس کا نتیجہ ہے کہ مساجد کمیٹی نے کمل ناتھ حکومت کو ائمہ وموذنین کی تنخواہوں میں اضافہ کے لئے نیا پرپوزل بھیجا ہے ۔کمیٹی کاکہنا ہے کہ اگر صوبہ میں ضابطہ اخلاق کا نفاذ نہیں ہوتا تو اب تک ائمہ وموذنین کو خوشخبری مل چکی ہوتی۔مساجد کمیٹی نے جہاں ائمہ وموذنین کی تنخواہوں کولےکر انتخابات کے بعد اپنی مہم کو تیز کرنے کا فیصلہ کیاہے وہیں ’’نماز خبری‘‘ موبائل ایپ سے مدھیہ پردیش کے دوسرے شہروں کو جوڑنے کا فیصلہ کیاگیاہے تاکہ صوبے کی تمام مساجد کی نماز کے اوقات سے بندہ مومن کو آگاہ کیا جاسکے ۔