بنیادی صفحہ / خبریں / عالمی معیشت متحرک رکھنے کے لیے 50 کھرب ڈالر مختص کرنے کا اعلان

عالمی معیشت متحرک رکھنے کے لیے 50 کھرب ڈالر مختص کرنے کا اعلان

G20 Summit 2020

ریاض : دنیا کے امیر ترین 20 ممالک کی تنظیم جی ٹوئنٹی کے سربراہ اجلاس میں شرکت کرنے والے رہنماؤں کا کہنا ہے کہ وہ کرونا وائرس سے ہونے والی معاشی تنزلی کا مقابلہ کرنے کے لیے عالمی معیشت میں 50 کھرب ڈالر سے زیادہ کا اضافہ کریں گے، تاکہ معیشت متحرک رہے ۔
اس کے علاوہ اجلاس کے شرکا نے صحت سے متعلق خسارے میں ایک دوسرے کو شریک کرنے اور عالمی تجارت میں ہونے والے انتشار کو دور کرنے پر اتفاق کیا ہے۔
اس اجلاس میں رہنما بالمشافہ شامل نہیں ہوئے بلکہ ویڈیو کانفرنس کے ذریعے اس میں شمولیت اختیار کی۔ اجلاس کے بعد جاری ہونے والے مشترکہ بیان میں کہا گیا ہے کہ اس عالمی وبا سے نمٹنے کے لیے یکجہتی کے ساتھ، ایک شفاف، مربوط، اور سائنسی بنیادوں پر استوار ایک وسیع تر لائحہ عمل کی ضرورت ہے۔
امریکہ کے صدر ڈونلڈ ٹرمپ کا کہنا ہے کہ وہ جی ٹوئنٹی اجلاس کی کارروائی پر جمعرات ہی کے روز ایک پریس کانفرنس میں بات کریں گے، جس میں وائٹ ہاؤس کی کرونا وائرس سے متعلق ٹاسک فورس کے ارکان بھی شامل ہوں گے۔
بیان میں یہ تو نہیں بتایا گیا کہ یہ رقم کہاں سے آئے گی۔ تاہم، بظاہر یہ وہ رقم ہے جو مختلف حکومتیں معیشت کو متحرک رکھنے کے لیے اپنی اپنی معیشت میں شامل کرتی رہی ہیں۔ اس میں امریکہ کی جانب سے دو کھرب ڈالر کی رقم شامل ہے جو اس وقت منظوری کے لیے کانگریس کے سامنے ہے۔
بیان میں عالمی وبا سے نمٹنے کے لیے، جی ٹوئنٹی گروپ نے تین بنیادی شعبوں میں عالمی تعاون کا ذکر کیا ہے۔
ان میں پہلا شعبہ عالمی معیشت کو متحرک رکھنے کا ہے، جس کے لیے پانچ کھرب ڈالر کی اضافی رقم اس میں شامل کی جائے گی، اور اس کا ہدف اقتصادی پالیسی، معاشی اقدامات اور وہ اسکیمیں ہوں گی جن کے ذریعے عالمی وبا کے سماجی، معاشی اور مالی اثرات پر قابو پایا جا سکے۔
دوسرا شعبہ صحت سے متعلق ہے۔ اس میں کہا گیا ہے کہ گروپ کے تمام ممالک ایک دوسرے کے ساتھ وقت پر شفاف معلومات اور صحت سے متعلق اپنے اپنے ڈیٹا کا تبادلہ کریں گے، اور دنیا بھر کے صحت سے متعلق نظاموں کو مضبوط بنائیں گے۔
تیسرا شعبہ عالمی تجارت میں آنے والے انتشار کو دور کرنے کا ہے۔ بیان میں کہا گیا ہے کہ لوگوں کی ضروریات کے مطابق، ادویات اور ضروری زراعتی پیداوار کی رسد جاری رکھنے پر کام کیا جائے گا تاکہ عالمی سطح پر رسد بند نہ ہو۔
یاد رہے کہ کرونا وائرس کی وجہ سے دنیا بھر میں معاشی سرگرمیاں معطل ہو کر رہ گئی ہیں جب کہ دنیا کی تقریباً ایک چوتھائی سے زیادہ آبادی مجبوراً گھروں میں بند ہے۔
جی ٹوئنٹی ممالک کے گروپ کے اس جلاس کی سربراہی سعودی عرب کے بادشاہ شاہ سلمان نے کی۔ سعودی عرب کا کہنا ہے کہ یہ غیر معمولی اجلاس اس لیے طلب کیا گیا تاکہ عالمی وبا اور اِس کے معیشتوں پر مرتب ہونے والے منفی اثرات سے نمٹنے کے لیے عالمی سطح پر کاوشوں کو آگے بڑھایا جا سکے۔
کرفیو، لوگوں کو گھروں میں بند رہنے کی ہدایات، کاروباری، تعلیمی اور سماجی سرگرمیوں پر بندشوں کی وجہ سے دنیا بھر کی معیشتیں سخت تنزلی کا شکار ہیں۔
سعودی عرب کو خام تیل کی پیداوار میں اضافے اور اس کی قیمتوں میں کمی کرنے کی وجہ سے بھی نکتہ چینی کا سامنا ہے۔ سعودی عرب نے یہ قدم اس وقت اٹھایا جب جی ٹوئنٹی گروپ کےتیل پیدا کرنے والے ایک اور رکن، روس نے تیل کی پیداوار میں کمی کرنے کے معاہدے پر دستخط کرنے سے انکار کر دیا تھا۔ دونوں ملک، عالمی منڈی میں اپنی تیل کی برآمدات بڑھانے کے لیے کوشاں ہیں۔
امریکہ، پہلے ہی سعودی عرب سے کہہ چکا ہے کہ وہ اپنی حکمت عملی پر نظر ثانی کرے۔ اس ہفتے سعودی عرب کے ولی عہد شہزادہ محمد بن سلمان سے ٹیلی فون پر بات کرتے ہوئے، امریکہ کے وزیر خارجہ مائیک پومپیو کا کہنا تھا کہ جی ٹوئنٹی کے رہنما اور تیل پیدا کرنے والا ایک اہم ملک ہونے کی حیثیت سے سعودی عرب کو فی الوقت معاشی بے یقینی کی صورتِ حال میں عالمی سطح پر توانائی اور دنیا بھر کی اقتصادی منڈیوں کی حوصلہ افزائی کے لیے اپنی ذمہ داری نبھانی چاہیے۔
اس ہفتے جی سیون گروپ، یعنی دنیا کی سات امیر ترین معیشتوں کے وزرائے خارجہ کے اجلاس میں اس وائرس کا گڑھ چین کو قرار دینے پر اختلافات سامنے آئے تھے۔ گروپ، امریکہ کی جانب سے اس وائرس کو ووہان وائرس کہلانے پر متفق نہیں ہو سکا تھا، جس کے بعد گروپ نے کوئی مشترکہ بیان دینے سے گریز کیا۔
دی انٹرنیشنل لیبر آرگنائزیشن کا کہنا ہے کہ دنیا کی تقریباً چالیس فی صد آبادی کے پاس ہیلتھ انشورنس نہیں ہے اور نہ ہی انہیں صحت کی سرکاری سہولتوں تک رسائی حاصل ہے۔ تنظیم کا کہنا ہے کہ دنیا کی چار ارب نفوس پر مشتمل آبادی میں سے پچپن فی صد کو کسی بھی قسم کا سماجی بہبود اور تحفظ حاصل نہیں۔
تنظیم کا کہنا ہے کہ صحت کا موجودہ بحران اس بات کو واضح کرتا ہے کہ سن دو ہزار آٹھ کے معاشی بحران کے بعد، حکومتیں، لوگوں کو کسی بھی قسم کی صحت کی سہولت یا بے روزگاری میں مدد فراہم کرنے میں ناکام رہی ہیں۔
آئی ایم یف اور ورلڈ بینک نے اجلاس کے آغاز سے قبل ہی، جی ٹوئنٹی کے ارکان کو خبردار کیا تھا کہ ترقی پزیر ممالک کو سخت قسم کے معاشی اور سماجی نتائج کا سامنا ہو سکتا ہے۔ ان ممالک میں دنیا کی ایک چوتھائی آبادی رہتی ہے۔
یہ اجلاس ایک ایسے وقت پر طلب کیا گیا ہے جب یہ تنقید شدت اختیار کر رہی ہے کہ دنیا کے امیر ترین ممالک نے دنیا بھر کی آبادی پر وائرس اور اس سے مرتب ہونے والے معاشی اثرات سے نمٹنے کے لیے اتفاق و اتحاد سے کوئی اقدامات نہیں اٹھائے۔

تعارف: نمائندہ خصوصی

ایک تبصرہ

  1. انصاری جمال ناصر

    سعودی عرب خام تیل کی قیمت کیوں کم کر رہا ہے؟ اس نقطے کو از راہ کرم واضح کریں..
    شکریہ
    جمال ناصر

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*