بنیادی صفحہ / خبریں / سری نگر میں تصادم، تین جنگجو اور ایک خاتون ہلاک، سی آر پی ایف کے دو اہلکار زخمی

سری نگر میں تصادم، تین جنگجو اور ایک خاتون ہلاک، سی آر پی ایف کے دو اہلکار زخمی

ja

سری نگر:جموں و کشمیر کے گرمائی دارالحکومت سری نگر کے بتہ مالو علاقے میں جمعرات کی علی الصبح ہونے والے ایک مسلح تصادم میں تین جنگجو اور ایک خاتون ہلاک جبکہ ایک افسر سمیت سنٹرل ریزرو پولیس فورس کے دو اہلکار زخمی ہوگئے ہیں۔
جموں و کشمیر پولیس کے ایک ترجمان نے بتایا کہ بتہ مالو علاقے میں جمعرات کی صبح چھڑنے والے مسلح تصادم میں تین عدم شناخت جنگجو مارے گئے ہیں۔
تاہم ذرائع نے بتایا کہ طرفین کے درمیان فائرنگ کے تبادلے میں ایک مقامی 45 سالہ خاتون کوثر جاں بحق ہوئی ہیں۔ نیز ایک افسر سمیت سی آر پی ایف کے دو اہلکار زخمی ہوگئے ہیں جنہیں علاج و معالجہ کے لئے فوجی ہسپتال منتقل کیا گیا ہے۔
سرکاری ذرائع نے بتایا کہ بتہ مالو کے فردوس آباد میں جنگجوئوں کی موجودگی سے متعلق خفیہ اطلاع ملنے پر پولیس اور سی آر پی ایف نے جمعرات کی علی الصبح قریب تین بجے مذکورہ علاقے کو محاصرے میں لیکر تلاشی آپریشن شروع کیا۔
انہوں نے کہا کہ مشتبہ جگہ کو محاصرے میں لینے کے بعد طرفین کے درمیان مسلح تصادم چھڑ گیا جس میں تین جنگجو مارے گئے۔
ذرائع نے بتایا کہ طرفین کے درمیان فائرنگ کے تبادلے میں ایک 45 سالہ خاتون کوثر جان شدید طور پر زخمی ہوئیں۔ اگرچہ انہیں ہسپتال لے جایا گیا لیکن وہ جانبر نہ ہوسکیں۔
انہوں نے مزید کہا کہ علاقے میں کسی بھی طرح کے احتجاجی مظاہروں کو روکنے کے لئے سکیورٹی فورسز کی بھاری جمعیت تعینات کر دی گئی ہے۔

تعارف: نمائندہ خصوصی

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*