ہندوجا برادران نے برطانیہ کے امیر ترین شخص کا تاج اپنے سر پر پہن لیا ہے جبکہ لکشمی متل دوسرے نمبر پر رہے ہیں۔معروف اخبار سنڈے ٹائمز کی جاری کردہ برطانیہ کی امیر ترین شخصیات کی فہرست میں انتہائی مالدار تاجر خاندان ہندوجا برادران سرفہرست رہےہیں۔ان کی مشترکہ دولت کا تخمینہ 11.9 ارب پاؤنڈ بتایا گیا ہے اور وہ پہلی بار اس فہرست میں اول آئے ہیں۔سری اور گوپی ہندوجا ۱۹۷۹میں لندن آئے تھے جہاں اشوک اور پرکاش بھائیوں کے ساتھ مل کر انہوں نے ہندوجا گروپ تشکیل دی تھی۔ہندوجا برادران سری چند اور گوپی چند ہندوجا کی دلچسپیاں صنعت اور فنانس میں ہے اور انھوں نے ٹائمز کی سالانہ فہرست میں آرسنل ایف سی کے شیئر ہولڈر علی شیر عثمانوو کی جگہ لی ہے۔اس میں شامل ہزار لوگوں کی مجموعی دولت پانچ کھرب بیس ارب پاؤنڈ رہی جو کہ گذشتہ سال کے مقابلے 15 فی صد زیادہ ہے۔فہرست میں شامل نئے لوگوں میں گرانڈ تھیفٹ آٹو اور کمپیوٹر گیم کینڈی کرش ساگا کے بنانے والے افراد بھی ہیں۔سیم اور ڈین ہاؤزر جنھوں نے گرانڈ تھیفٹ آٹو بنائی تھی دونوں کی مشترکہ دولت نو کروڑ پاؤنڈ بتائی گئی ہے اور وہ اس فہرست میں 947 ویں مقام پر ہیں۔اس فہرست میں ایک اور نیا نام ٹیسکو کے مالک سر ٹیری لیہی کا ہے۔ ان کی دولت 10 کروڑ بتائی گئی ہے جبکہ وہ 863 ویں نمبر پر ہیں۔اس فہرست میں پہلی بار شامل ہونے والوں میں سرفہرست کیری اور فرینکوا پیرودو اور ان کا کنبہ ہے۔ یہ لندن میں مبنی پرینکو تیل اور گیس آپریشن کے مالک ہیں۔ ان کی مشترکہ دولت چھ ارب بتائی گئی ہے جبکہ وہ مجموعی طور پر چودھویں نمبر پر ہیں۔آن لائن میں تیزی آنے کے بعد کئی نئے نام اس فہرست میں شامل ہوئے ہیں جن میں بوہو ڈاٹ کوم کے محمود کمانی ہیں جن کی دولت 30 کروڑ بتائی گئی ہے۔ڈیوڈ اور وکٹوریہ بیکھم کی دولت 21 کروڑ پاؤنڈ بتائی گئی ہے۔ٹی وی پروگرام ایکس فیکٹر کے سربراہ سائمن کوویل کی دولت کا تخمینہ 30 کروڑ لگایا گیا ہے۔معروف شیف جیمی اولیور اور ان کی اہلیہ جولز کی دولت نو کروڑ سے بڑھ کر 24 کروڑ پہنچ گئی ہے۔