نئی دہلی: (یو این بی ) اتر پردیش کے قدآور لیڈر اعظم خان کی بھینس چوری ہونے پر اتر پردیش پویس محکمے میں کھلبلی مچ گئی تھی۔ اب اسی طرح کا واقع دہلی میں پیش آیا ہے۔ جے ڈی یو کے رکن پارلیمنٹ مہیندر پرساد کے گھر کٹہل چوری ہونے سے پولیس محکمے میں کھلبلی مچ گئی۔ جیسے ہی دہلی پولیس کو کٹہل چوری کی شکایت ملی چور کی تلاش کے لئے فوری طور پر ایک ٹیم تشکیل دے دی گئی۔ اس ٹیم میں فنگر پرنٹس بیورو اور کرائم بیورو کے افسر شا مل کئے گئے اور ٹیم رکن پارلیمنٹ کے بنگلے پر پہنچ گئی۔ ٹیم نے اس باغیچے کا جائزہ لیا جہاں سے کٹہل چوری ہوا تھا۔ جب پویس کی ٹیم نے باغیچے کا جائزہ لیا تو پتہ چلا کہ درخت پر لگے 9 میں سے دو کٹہل غائب ہیں ۔ ایک پولیس افسر کا کہنا ہے کہ رکن پارلیمنٹ کے پرسنل سکریٹری نے فون کرکے چوری کی شکایت درج کرائی تھی۔ پولیس نے پر سنل سکریٹری کی شکایت پر چوری کا معاملہ درج کرکے اس کی جانچ شروع کر دی ہے۔ تقریبا دس پولیس افسران نے باغیچے کا جائزہ لیا تاکہ چور تک پہنچنے میں کوئی سراغ ہاتھ آسکے۔ پویس ٹیم کے ایک افسر کا کہنا ہے کہ موقع واردات کی جانچ پڑتال کرنے کے بعد فٹ پرنٹ ملے ہیں۔ پولیس کا کہنا ہے کہ فٹ پرنٹ تقریبا6 انچ کا ہے ۔ فٹ پرنٹ سے اندازہ لگایا جا رہا ہے کہ کٹہل چوری کا کام کسی بچے کا ہو سکتا ہے جو بائونڈری پار کرکے کٹہل چوری کرنے میں کامیاب رہا ۔ حالانکہ کٹہل کی چوری نے رکن پارلیمنٹ کے بنگلے کی سیکورٹی پر سوالیہ نشان لگا دیا ہے۔ موقع واردات سے جو فٹ پرنٹ اور فنگر پرنٹ لئے گئے ہیں انہیں جانچ کے لئے فورینسک لیب بھیج دیا گیا ہے۔ جب تک فورنسک رپورٹ نہیں آتی ہے تب تک پویس کی ٹیم سیکورٹی گارڈ ، گھر کے نوکر اور ڈرائیور سے پوچھ تاچھ کرے گی۔ چور تک پہنچنے کے لئے پولیس سی سی ٹی وی کیمرے کا بھی سہارا لے رہی ہے۔