الحراء پبلک اسکول شاہ گنج کے زیر اہتمام ’اورل ڈینٹل کیمپ‘ کا انعقاد
پٹنہ، 12 جولائی (یو این بی): آج الحراء پبلک اسکول ، شاہ گنج ، پٹنہ میں انڈین ڈینٹل ایسوسیشن کے Bright Smile Bright Futureکے بینرتلے ایک روزہ ڈینٹل کیمپ کا انعقاد عمل میں آیا۔ اس ڈینٹل کیمپ میں ڈاکٹر سید صبیح احمد (ڈینٹل سرجن) اور ڈینٹل ایسوسیشن کے صدر نے شرکت کی۔ ان دونوں اہم شخصیات کی شرکت نے کیمپ کو کامیاب بنانے میں بھرپور تعاون دیا۔ اس کیمپ کا اصل مقصد بچوں کے اندر دانتوں کے تئیں بیداری پیدا کرنا تھا۔ کیمپ میں ڈاکٹر امت کمار، ڈاکٹر رشمی و ڈاکٹر ریاض حسن نے درجہ اول تا پنجم کے بچوں کے دانتوں کا معائنہ کیا اور مفید مشوروں سے نوازا۔ اس دوران بچوں کے چیک اپ کے ساتھ انہوں نے بچوں کو کالگیٹ پیسٹ اور برش چارٹ بھی فراہم کرایا۔ انہوں نے بچوں کو مشورہ دیتے ہوے کہا کہ ہر چھ مہینے میں اپنے ڈنٹسٹ کے پاس ضرور جا کر چیک اپ کروائیں تاکہ دانتوں کی مضبوطی اور خوبصورتی بنی رہے۔ اس کے علاوہ بچوں کو مشورہ دیا گیا کہ ہر تین ماہ پر اپنے برش کو وہ ضرو ر بدلیں ۔ وٹامنس اور منرلس سے بھرپور غذا کا استعمال کریں ۔ روزانہ دو بار اپنے دانتوں کی صفائی کریں ۔چھوٹے چھوٹے بچوں میںخاص دانت کی بیماری جو شروعاتی مرحلے میں زیادہ پائی جاتی ہے اس کو روکنے کے لئے اور بچوں میں دانتوں کے تئیں بیداری پیدا کر نے کے لئے اسکول کے تسلیم الدین لایبریری ہال میں درجہ اول سے درجہ پنجم کے کلاس اساتذہ کرام کے ساتھ انہیں ٹریننگ بھی دی ۔ ساتھ ہی انہوں نے ان اساتذہ کرام کو سند سے بھی نوازا۔ اس پروگرام کا انعقاد اسکول کے ڈائرکٹر ڈاکٹر نذیر اور پرنسپل سید ندیم احمد کی خاص دلچسپی کے نتیجے میں عمل میں آیا۔ اس موقع پر انہوں نے ڈاکٹروں کا شکریہ ادا کرتے ہوئے اس قدم کو مستحسن قرار دیا اور بچوں میں بیداری پیدا کرنے پر زور دیا۔ پروگرام کا اختتام اقبال احمد کے اظہار تشکر پر ہوا۔