Maeeshat – معیشت

لکھنؤ، 19 جولائی (یو این بی): اتر پردیش کی خراب نظم و نسق سے مرکزی وزیر برائے فروغ انسانی وسائل اسمرتی ایرانی کافی مایوس ہیں۔ ایک دن کے امیٹھی دورہ پر پہنچی ایرانی نے کہا کہ ریاستی حکومت قانون کو صرف کتابوں تک ہی محدود نہ رکھے بلکہ اسے زمین پر بھی اتارے۔ امیٹھی سے لوک سبھا انتخابات لڑنے والی اسمرتی ایرانی نے اعتراف کیا کہ امیٹھی کی عوام وہاں کے ممبران پارلیمنٹ سے کہیں زیادہ ان سے امیدیں رکھتی ہے۔ انھوں نے کہا کہ میری کوشش یہاں کے عوام کی امیدوں پر کھرا اترنے کی رہے گی۔

اتر پردیش میں دن بہ دن خواتین پر بڑھتے مظالم پر اسمرتی ایرانی نے کہا کہ سب سے زیادہ آبادی والی ریاست میں قانون کو صرف کتابوں تک ہی محدود رکھا جا رہا ہے جب کہ میرا ماننا ہے کہ قانون پر سختی کے ساتھ عمل کیا جائے تو جرائم پیشے کوئی بھی جرم کرنے سے قبل دس مرتبہ سوچیں گے۔ ان کا ماننا ہے کہ اتر پردیش میں قانون و انتظامیہ کا صحیح استعمال نہیں ہو رہا ہے۔ مرکزی وزیر بننے کے بعد پہلی مرتبہ امیٹھی پہنچی اسمرتی ایرانی نے کہا کہ وہ امیٹھی کی عوام کا شکریہ ادا کرنے آئی ہیں۔ وہ اب ہمیشہ امیٹھی سے جڑی رہیں گی۔ کوشش رہے گا کہ ہر ماہ میں کم سے کم ایک بار تو ضرور یہاں کے لوگوں کی خبر لیں۔ انھوں نے کہا کہ یہاں کی عوام کو مجھ سے کافی امیدیں وابستہ ہیں۔ عوام یہاں کے ممبران پارلیمنٹ کی جگہ مجھ سے زیادہ امیدیں وابستہ رکھتے ہیں۔ میرا یہاں سے ممبر پارلیمنٹ منتخب نہ ہونا کافی افسوسناک ہے، لیکن عوام جس طرح سے مجھے عزت دے رہی ہے وہ ممبر پارلیمنٹ منتخب ہونے سے کہیں زیادہ ہے۔
اس سے قبل لکھنؤ کے اموسی ائیر پورٹ سے اتر کر اسمرتی ایرانی نے سیدھے سڑک راستہ سے امیٹھی کا رخ کیا۔ امیٹھی میں انھوں نے برولیا کے آتشزنی واقعہ کے متاثرین سے ملاقات کی ۔اسمرتی ایرانی جامو میں کانگریسی لیڈر جنگ بہادر سنگھ کے یہاں بھی پہنچیں۔ جنگ بہادر سنگھ کے بیٹے کا حال ہی میں مسافر خانہ میں گولی مار کر قتل کر دیا گیا تھا۔