پدم شری ڈاکٹر محمود الرحمن ریجنل انسٹی ٹیوٹ آف سائنس اینڈ ٹیکنالوجی(میگھالیہ) میں خطاب کرتے ہوئے(تصویر:معیشت)

گوہاٹی:(معیشت نیوز)’’علم کا حصول جس ایمانداری کے ساتھ کی جائے گی اس کے نتائج بھی اسی طرح رونما ہوں گے۔یو نیورسٹی آف سائنس اینڈ ٹکنالوجی کے بانی محبوب الحق اس ادارے کو خدائی مدد کے سہارے چلا رہے ہیں کیونکہ اتنا بڑا کام کسی انسان کے بس کا نہیں ہے۔‘‘ان خیالات کا اظہار پدم شری ڈاکٹر محمود الرحمن نےمیگھالیہ کے ضلع رائے بھوئی، ٹکنو سٹی میں ای آر ڈی فائونڈیشن کی جانب سے چلائے جارہے ریجنل انسٹی ٹیوٹ آف سائنس اینڈ ٹکنالوجی میں خطاب کرتے ہوئے کیا۔ انہوں نے امام غزالی کا واقعہ بیان کرتے ہوئے کہا کہ’’ ایک یونیورسٹی میں ۱۴برس گذارنے کے بعد جب وہ وہاں سے حاصل ہونے والی علم و فہم کی باتیں ڈائری میں نوٹ کرکے سفر پرروانہ ہوئے تو راستے میں ڈاکوئوں نے انہیں گھیر لیا اور ان کا سارا سامان لوٹ لیا۔آپ نے ڈاکوئوں کے سردار سے کہا کہ تم سارا سامان تو لے لو لیکن میرا نوٹ بک دے دو کیونکہ اس میں میرا چودہ برس کی کمائی محفوظ ہے۔ڈاکو کے سردار نے کہا کہ ’’یہ کیسی عقلمندی ہے کہ اگر یہ ڈائری نہ رہے تو تمہارا ۱۴برس خراب ہوجائے۔‘‘امام غزالی کے دل میںڈاکو کی یہ بات گھر کر گئی اور انہوں نے اس کے بعد کوئی نوٹ تیار کرنے کا کام چھوڑ دیا اور تمام علم اپنے سینے میں محفوظ کرنے لگے۔آج مذکورہ یونیورسٹی اظہر یونیورسٹی کے نام سے جانی جاتی ہے اور دنیا کی قدیم یونیورسٹیوں میں اس کا شمار ہوتا ہے۔‘‘ بمبئی مرکنٹائل بینک کے چیرمن اور علی گڈھ مسلم یونیورسٹی کے سابق وائس چانسلر ڈاکٹر رحمن نے کہا کہ ’’یہاں آکر مجھے جس قدر خوشی ہو رہی ہے اس کا اندازہ نہیں لگایا جاسکتا جبکہ ذہین طلبہ و طالبات کو دیکھ کر میں بہت متاثر ہوا ہوں،سائنس و ٹیکنالوجی کے میدان میں یہاں کے طلبہ کس قدر آگے جارہے ہیں اس کا اندازہ مجھے ایکزبیشن دیکھ کر بھی ہوا ہے جہاں طلبہ و طالبات نے دبئی کے برج الخلیفہ سے لے کر دنیا کی بیشتر ٹیکنالوجی کو اپنے ہنر سے صفحہ قرطاس پر منتقل کرنے کی کوشش کی ہے۔‘‘

پدم شری ڈاکٹر محمود الرحمن اوریونیورسٹی کے چانسلرمحبوب الحق ریجنل انسٹی ٹیوٹ آف سائنس اینڈ ٹیکنالوجی(میگھالیہ) میںطلبہ و طالبات کے تقسیم انعامات پروگرام میں شرکت کرتے ہوئے(تصویر:معیشت)

یونیورسٹی کے چانسلر محبوب الحق نے ڈاکٹر محمود الرحمن کی خیرمقدم کرتے ہوئے کہا کہ ’’ہماری خواہش یہ ہے کہ نارتھ ایسٹ کے باہر جو لوگ رہ رہے ہیں وہ جانیں کہ اس علاقے میں کیا کچھ ہورہا ہے اور کس طرح کی تعلیمی سرگرمی انجام دی جارہی ہے۔چند برسوں میں مذکورہ یونیورسٹی جس طرح میگھالیہ کی نمبر ون یونیورسٹی بن گئی ہے یہ صرف اللہ رب العزت کا کرم ہی ہے۔‘‘
واضح رہے کہ اس پروگرام میں انجینئرنگ فیکلٹی کے طلبہ و طالبات کو اسپورٹس میں نمایاں کامیابی پر پدم شری کے ہاتھوں انعامات سے بھی نوازہ گیا۔