ایسی کمپنی جہاں چھٹی کرنے پر پانچ لاکھ روپئے بونس ملتا ہے
ڈینور،امریکہ (ایجنسی)کتنا لطف آئے گا اگر کمپنی آپ کو آفس آنے نہیں بلکہ چھٹی کرنے کے لئے پیسے دے ۔اس پر بھی یہ شرط ہو کہ آپ کو چھٹی کے دوران پوری طرح ریلیکس موڈ میں ہی رہنا ہے ۔اگر اس کی خلاف ورزی کی تو چھٹی کے لئے ملنے والی رقم کاٹ لی جائے گی ۔چونکنے کی ضرورت نہیں ہم آپ کو کوئی خواب نہیں دکھا رہے ہیں بلکہ ایک سافٹ ویئر کمپنی میں جو ہو رہا ہے اس کی حقیقت سے آگاہ کررہے ہیں ۔ ایسا امریکہ کے شہر ڈینور میں قائم سافٹ ویئر کمپنی ’فل کانٹیکٹس‘میں ہو رہا ہے ۔کمپنی میں مالیات اور آپریشن ڈائریکٹر جینیٹ رسل بتاتی ہیں کہ وہ جب چھٹی پر ہوتی ہیں موبائل ای میل اپلیکیشن کو ڈیلیٹ کر دیتی ہیں اور اپنے لیپ ٹاپ کو ایک کونے میں ڈال دیتی ہیں ۔یہی ان کی کمپنی کی پالیسی بھی ہے وہ بتاتی ہیں ’جب ہم ورک لائف بیلنس کی بات کرتے ہیں تو ہم اسے پورا بھی کرکے دکھاتے ہیں جس کا یہ ثبوت ہے‘۔
تقریباً چار سال پرانی کمپنی میں چھٹی ایک سنجیدہ کام ہے ۔ ملازم کو سال میں سات ہزار پانچ سو ڈالر تقریباً پانچ لاکھ روپئے چھٹی لینے کے لئے کمپنی سے بونس ملتا ہے ۔اس میں شرط یہ ہے کہ اس دوران آپ کو کمپنی کے کام کاج سے بالکل دور رہنا ہے ۔اس قانون کو توڑنے پر رقم میں کٹوتی کی جاتی ہے۔
فل کانٹیکٹس کے ڈائریکٹر بزنس ڈیولپ منٹس ڈریو لارنس کا کہنا ہے کہ اس سے ملازمین میں نئی قوت و توانائی پیدا ہوتی ہے اور وہ چھٹی سے آنے کے بعداپنے ٹارگیٹ کو پورا کرنے میں مصروف ہو جاتے ہیں۔