جمیل احمد شیخ۔ اورنگ آباد موبائل: 9028282166
السلام علیکم
آپ ایک مشہور ومعروف شاعر ہیں۔اس میں کوئی شک نہیں۔ملک کے حالات کو دیکھتے ہوئے حکومت کاکوئی ردعمل نہ دکھنے کی صورت میں ملک کے مختلف زبانوں کے ادیبوں اور شعراء نے اپنا احتجاج درج کروانے کے لئے خود کوملے ساہتیہ اکادمی ایوارڈ کولوٹایا۔ لیکن اُس وقت کوئی اردو کا ایسا ادیب اور شاعر نہیں تھا جس نے پہل کی۔کچھ وقت کے بعد رحمٰن عباس نے اپنا ایوارڈ واپس لوٹانے کا اعلان کیا۔اس وقت ہمیں تھوڑااچھالگا۔ کہ ہمارے ادبا وشعراء بھی جاگ رہے ہیں۔احتجاج درج کروانے کےلئے ایوارڈ واپس لوٹارہے ہیں۔ پھر بھی افسوس رہا،کیونکہ ہماری تعداد بہت کم تھی۔کچھ دنوں پہلے سننے میں آیاتھا کہ آپ احتجاجی طورپر ایوارڈ واپس لوٹانے کے موڈ میں نہیں تھے۔
پھراچانک ایساکیاہوگیاکہ آپ نے ایک نیشنل نیوزچینل پرآکر جذبات کے ساتھ اپناایوارڈ اور رقم واپس کرنے کااعلان کردیا۔ جیسے ہی آپ نے اعلان کیا اُس وقت پورے ملک میں ایک طرح کی بریکنگ نیوزچلی۔ ہم سبھی کو بہت راحت ملی کہ چلو ہماری طرف سے مشہور ومعروف شاعر ہونے کی حیثیت سے آپ نے بہت اچھافیصلہ لیا۔اِس وقت تو آپ کو اللہ نے پل بھر میں اور زیادہ مشہور کردیا۔میرے مشاہدے کے مطابق اس اعلان کے بعد جولوگ آپ کو نہیں جانتے تھے وہ بھی جاننے لگے۔کیوں کہ آپ نے تھوڑی دیر کےلئے جو مسلمانوں کی نمائندگی کی تھی۔اللہ نے کچھ گھنٹوں میں آپ کو اور زیادہ مشہور کردیا۔بہت دل خوش ہوا منورصاحب!ایسالگ رہاتھا اللہ نے آپ کو عزت وشہرت کے ساتھ ہمت بھی عطاکی کہ آپ نے مسلمانوں کی طرف سے اپنی بات رکھی۔
کچھ وقت کے بعد یہ بیان بھی سننے کوملا کہ آپ کو وزیراعظم کے دفتر سے ملاقات کےلئے فون آیا۔یہ سن کر تو ایسالگا جیسے آپ کے ایوارڈ واپس کرنےسے حکومت میں ہلچل پیداہوگئی۔ایسالگ رہاتھا جیسے اب تو کچھ ہوگا۔مسلمانوں کی طرف سے بولنے والے شخص کو اللہ نے کھڑا کردیا۔نیوز چینل پر اپنی بات رکھتے ہوئے آپ نے جو سچائی بیان کی وہ قابل تعریف ہے۔
لیکن پھر ایسا کیا ہوگیا کہ آپ کے منھ سے محبت کے پھول برسنے لگے۔یہاں تک آپنے رشتہ بھی جوڑدیا۔بڑا بھائی ماننے لگے۔اور تو اور آپ جوتے بھی اُٹھانے کو تیار ہوگئے۔
ہمیں اس بات سے کوئی اعتراض نہیں۔آپ کی مرضی آپ چاہےجوکریں۔ لیکن ایسا کرنا ہی تھاتو اتنا سارا ڈھنڈورا کیوں پیٹا گیا؟کیوں آپ جذبات میں آئے،آپ کی زبان سے سچائی بھی نکلی پھر اچانک ایساکیاہوگیا کہ آپ محبت کی غزل گانے لگے۔ بڑے بڑے پیارے اشعارآپ کے منھ سے نکلے۔
منوررانا صاحب!ہم نے آپ کی بات کو ایک تیرکے طورپر دیکھا،ہمیں لگا آپ کی بات حکومت کے دل ودماغ کوچیردے گی۔جب وزیراعظم دفتر سے آپ کو فون آیا تو ہمیں لگا کہ آپ کو اللہ نے مسلمانوں کی طرف سے اپنی بات رکھنے کاموقع دیا۔ایسا ہوتا بھی۔۔۔۔
لیکن پی ایم او پہنچنے سے پہلے جوآپ کے تیور دیکھنے کومل رہے ہیں اُس سے ایسانہیں لگتا کہ جیسا آپ نے نیوز چینل پر جذبانی انداز میں مسلمانوں کی طرف سے بات رکھی تھی اُس کو آپ دوبارہ دہرائیں گے۔اب تو آپ بدل گئے ہیں منورصاحب!
ہم آپ سے یہی پوچھنا چاہتے ہیں کہ ایسا کیاہوا،جوآپ ایک فون کی وجہ سے پل بھرمیں بدل گئے؟شک بھی ہورہا ہے کہ کہیں آپ بھی سیاست تونہیں کرنے لگے۔اتنے کم وقت میں اتناساراہونا بہت سارے سوالات کوپیداکرتاہے۔
خیر ہم توادنیٰ حیثیت کے لوگ ہیں،ہماری کیا حیثیت جو آپ کومشورہ دیں،لیکن منور رانا صاحب!دل دکھتا ہے،ایسا لگ رہاہے جیسے کسی نے عظیم تحفہ دے کر ہم سے چھین لیاہو۔ ہم آپ کی نمائندگی کوعظیم تحفہ کے طور پر دیکھ رہے تھے؟ آپ نے زندگی میں کبھی سرکاری ایوارڈ نہ لینے کا بھی اعلان کردیا تھا پھر کیاہوا؟آپ نے حکومت کو کھری کھوٹی بھی بہت سنائی،پھر ایسا کیاہوگیا کہ آپ کے منھ سے محبت کے پھول برسنے لگے۔یہاں تک کہ آپ جوتا بھی اُٹھانے کوتیار ہوگئے۔ہمارے سوالوں کا جواب ضروردیجئے گا منور صاحب!
میں اُن ادیبوں اور شعرا کو سلام کرتا ہوں جنہوں نے ایوارڈ واپس کئے لیکن اپنی زبان پر ایسی باتیں بالکل بھی نہیں لائیں جو باتیں آج آپ کہہ رہے ہیں منوررانا صاحب!
ہم سلام کرتے ہیں اُن ادیبوں اور شعرا کو جنہوں نے محمد اخلاق کے قتل کوملک کے لئے شرمندگی کاباعث بتایا۔
آخرمیں ہم آپ سے یہی کہیں گے کہ بے شک !آپ وزیراعظم کے دفتر جائیں،آپ کوملا ہوا ایوارڈ بھی ضرور واپس لیں،لیکن ہمارے وزیراعطم سے اُن کے سامنے ملک میں مسلمانوں کے ساتھ ہورہے برتاؤ پرضرور روشنی ڈالیں۔ ہماری کیفیت اُن کو بتائیں ،اُن کو بتائیں کہ ہم ’’سب کا ساتھ،سب کاوکاس‘‘اس نعرے پر عمل آوری چاہتے ہیں۔ ہم منتظر ہیں یہ دیکھنے کےلئے کہ ملک میں مسلمانوں کے ساتھ ہورہے بھیدبھاؤ کو کب ختم کیاجائے گا؟ ہمارے وزیر اعظم سے یہ بھی ضرور پوچھنا کہ انتخاب سے پہلے آپ کاجوخواب تھا کہ آپ مسلم نوجوانوں کے ایک ہاتھ میں قرآن اور ایک ہاتھ میں کمپیوٹردیکھنا چاہتے تھے،اس خواب کو آپ کب پورا کررہے ہیں؟
آج ملک میں مسلمانوں میں غریبی،بے روزگاری دن بدن بڑھتی جارہی ہے،اس کے لئے ہمارے وزیراعظم نے کیالائحہ عمل تیار کیا،یہ بھی ضرور پوچھیں؟انہوں نے مسلمانوں کے لئے اب تک کیاٹھوس قدم اُٹھائے ہیں یہ بھی ضرور پوچھیں؟ یہ ایسے سوالات ہیں جو ہمیشہ ہمارے دلوں میں کھٹکتے رہےہیں۔ہم اس کا جواب جاننا چاہتے ہیں،معمولی باتوں اور افواہوں پرقتل ہورہے ہیں،اس کی روک تھام کےلئے ہمارے وزیراعظم کیاکرنے جارہے ہیں،یہ بھی ضرورپوچھیں؟
اللہ نے آپ کو اس قابل بنایاہے اسلئے ہم اللہ سے دعا کرتے ہیں کہ آپ کو ہمت دے اور آپ ہمارے سوالوں کا جواب حاصل کرنے کی کوشش کریں۔ایسی امید کرتے ہیں کہ آپ وزیراعظم سے ملاقات کر آپ مسلمانوں کے مسائل کوان کے سامنے ضرور رکھیں گے۔۔۔۔
