Maeeshat – معیشت

ممبئی : (معیشت نیوز)ملک میں معاشی خبروں ،معاشی تجزیہ ،معاشی امور سے متعلق انٹرویوز،معاشی تجارتی اجلاس وغیرہ کے لیے اپنی شناخت بنا چکا معیشت میڈیا گروپ(www.maeeshat.in) اب طلبہ و طالبات کی رہنمائی کے لیے معاشی امور پر مختلف ورکشاپ کا انعقاد کر رہا ہے ۔اسی سلسلے کی ایک کڑی اردو اخبارات میں معاشی خبروں کی رپورٹنگ ہے۔ معیشت میڈیا کے ڈائرکٹر دانش ریاض کے مطابق ’’اردو اخبارات میں معاشی خبروں کی کمی دیکھی جاتی ہے ،عموماً کمیونیٹی میڈیا معاشی خبروں کو ویسی اہمیت نہیں دیتا جیسی کہ دوسری خبروں کو دی جاتی ہےحالانکہ موجودہ دور میں اردو نئی بلندیوں کی طرف عازم سفر ہے۔ اقلیتوں سے وابستہ افراد اردو زبان میں بھی معاشی و تجارتی خبریں پڑھنا چاہتے ہیں لیکن قابل و ہونہار رپورٹر کے نہ ہونے کی وجہ سے نہ تو اردو کے اخبارات مذکورہ خلا کو پُر کر پارہے ہیں نہ ہی کوئی دوسرا ادارہ خاطر خواہ اس کی طرف توجہ دے پارہا ہے یہی وجہ ہے کہ معیشت میڈیا نے اس ذمہ داری کو ادا کرنے کا بیڑا اٹھایا ہے‘‘۔دانش ریاض کے مطابق ’’معیشت گروپ کی جانب سے ’’اردو اخبارات میں تجارتی خبروں کی رپورٹنگ‘‘پر یک روزہ ورک شاپ 16دسمبر 2015؁ بروزبدھ صبح دس بجےتا پانچ بجے ممبئی کے پریس کلب ہال میںمنعقد ہونے جارہا ہے جس میں انڈسٹری کے ماہرین سے استفادہ کا موقع ملےگا۔‘‘انہوں نے کہا کہ ’’بمبئی اسٹاک ایکسچینج کے سی او او و بمبئی بروکرس فورم کے ذمہ دار آدتیہ سری نواس ،ہارورڈ بزنس اسکول (امریکہ)کے سابق فیلو ڈاکٹر شارق نثاربطور خاص لوگوں کی رہنمائی کا فریضہ انجام دیں گے۔لہذا صحافی ،اہل قلم حضرات کواگر مذکورہ ورکشاپ میں شرکت کرنی ہو تووہ از راہ کرمmaeeshatmedia@gmail.comپر اپنا رجسٹریشن کروا دیں ۔‘‘ واضح رہے کہ رجسٹریشن کے لئے اپنا نام،پتہ،فون نمبر ،ای میل کے ساتھ جس ادارے میں کام کرتے ہوں اس کی تفصیل لازمی ہے۔ورکشاپ کے لیے صرف تیس (۳۰)نشستیں رکھی گئی ہیں لہذا جلد از جلد اپنا رجسٹریشن کرائیں اور پہلے آنے والوں میں جگہ بنائیں۔‘‘
دانش ریاض کے مطابق ’’بیرون ممبئی سے تشریف لانے والے لوگوں کے لیے قیام و طعام کے انتظام کی کوشش کی جائے گی لیکن یہ اسی وقت ممکن ہوگا جب لوگ اپنا نام پہلے سے رجسٹریشن کرواچکےہوں۔‘‘