روزنامہ ’’ہم آپ ‘‘ کی پری لانچنگ تقریب میں اسٹیج پر(دائیں سے بائیں) جناب خلیل زاہد،مولانا ظہیر عباس،منور پیر بھائی،ایڈوکیٹ سید جلال الدین،شمشیر پٹھان اور دانش ریاض کو دیکھا جا سکتا ہے۔(تصویر: معیشت)
نمائندہ خصوصی معیشت ڈاٹ اِن
ممبئی: (معیشت نیوز) ’’روز نامہ ’ہم آپ‘ ہرلحاظ سے ایک منفرد اخبار کے روپ میں ہم آپ کے سامنےہوگا۔ ’ہم آپ‘ کی پہلی اور سب سے بڑی خصوصیت یہ ہوگی کہ یہ کسی بھی دوسرے اخبار کے مقابلہ میں صحیح معنوں میںاور مکمل طور پرہم آپ کا ترجمان ہوگاا اور ہم آپ کا ہی اخبار ہوگا۔ ’ہم آپ‘ کسی بھی مخصوص سیاسی،فلسفہ، مذہبی نظریہ اور مسلکی روش کی پرچھائیںسے آزادہوگا جبکہ ہر وہ سیاسی جماعت جو جمہوریت اور سیکولرزم کے اصولوں کی پیروکار ہو ،’ہم آپ‘ کی سیاسی جماعت ہوگی۔ ہر وہ مذہبی نظریہ جو انسانیت اور اخوت کا علم بردار ہو، ’ہم آپ‘ کا مذہبی نظریہ ہوگا۔ساتھ ہی ہر وہ مسلک جو باہمی رواداری اور ایک دوسرے کو برداشت کرنے کی ہدایت دے، ’ہم آپ‘ کا مسلک ہوگا‘‘۔ان خیالات کا اظہار روزنامہ ’’ہم آپ‘‘ کے ایڈیٹر حسن کمال نے ممبئی سینٹرل کے ہوٹل ساحل میں حاضرین کو خطاب کرتے ہوئے کیا۔
روزنامہ ’’ہم آپ ‘‘ کی پری لانچنگ تقریب سے جناب حسن کمال خطاب کرتے ہوئے جبکہ منور پیر بھائی،ایڈوکیٹ سید جلال الدین،شمشیر پٹھان اور نظام الدین راعین کو بھی دیکھا جا سکتا ہے۔(تصویر: معیشت)
واضح رہے کہ ممبئی سے روزنامہ ’’ہم آپ ‘‘ کے اجرا کی تیاریاں چل رہی ہیں ۔ نیشنلسٹ کانگریس پارٹی اقلیتی مورچہ کے قومی صدر ایڈوکیٹ سید جلال الدین اس اخبار کے روح رواں ہیں۔ماہ اکتوبر میں جب کہ نائب صدر جمہوریہ ہند اپنا وقت متعین کر دیں گے اجراء کی حتمی تاریخ کا اعلان کردیا جائے گا۔
حسن کمال نے کہا کہ ’’کہا جاتا ہے کہ آج کی دنیا میں انفارمیشن یا باخبری ہی کامیابی کی کنجی ہے۔ یہ اخبار انفارمیشن اور باخبری کی اس کنجی کو ہم آپ کے حوالے کرنا اپنا فرض منصبی مانتا ہے ۔’ہم آپ ‘کا یہ یقین کامل ہے کہ قاری کو ہروہ خبرجاننے کا حق ہے جس کا تعلق اس کی زندگی سے ہو یا جو اس کی معلومات میں اضافہ کرے، اسے حالات اور حقائق کا سامنا کرنے کے لئے پوری طرح باخبر بنائے۔’ہم آپ‘ کا مشن ہے کہ قاری تک ہر خبر پہنچائی جائے۔ ’ہم آپ‘ کو یہ بھی یقین ہے کہ فرقہ پرستی اور عدم برداشت کے رجحانات اس ملک ، اس کی صدیوں پرانی روایتوں اور اس کی موجودہ جمہوریت کے لئے ایک سم قاتل ہے ۔ اس لئے ہر طرح ، ہر قسم اور ہر طرح کی فرقہ واریت سے لڑنا اور اسے شکست دینا ’ہم آپ‘ کا اولین اصول ہے۔ ’ہم آپ‘ کو ممبئی کے تجربہ کار، بالغ نظر اور بیدار شعور اردو صحافیوں کی ایک مستعداور بیدار مغز ٹیم کا تعاون حاصل ہے‘‘۔
ایڈوکیٹ سید جلال الدین نے کہا کہ ’’اردو میڈیا کے بارے میں غلط یا صحیح طور پر یہ تاثر قائم ہو گیا ہے کہ اردو میڈیا بہت زیادہ خواتین دوست نہیں ہے۔ خواتین کے ان تمام حقوق کی طرف بھی اس کا رویہ کافی سرد مہر ہوتا ہے ، جو ہندوستان کے آئین اور اگر وہ مسلمان ہیں تو اسلام و قرآن کریم نے انہیں دئے ہیں ۔ ’ہم آپ‘ کے نزدیک یہ تاثر دور کیا جانا از بس ضروری ہے۔ ’ہم آپ‘ کے لئے خواتین کی اپنی تعلیمی ترقی اور معاشی خود کفالت کی جدو جہد میں ان کا ساتھ دینا اور ان کے لئے آواز اٹھانا ایک مذہبی فریضے سے کم نہیں ۔ علاوہ ازیں خواتین کی دلچسپی کے لئے دلچسپ اور پر اسرار کہانیوں کے سلسلے ’ہم آپ‘ کی منفرد خصوصیات ہوںگے۔ ہمیں یقین ہے کہ ’ہم آپ‘ کا زبردست عوامی استقبال کیا جائے گا‘‘۔
واضح رہے کہ مذکورہ پروگرام میں اردو جرنلسٹ ایسو سی ایشن کے صدر خلیل زاہد،منور پیر بھائی ،کانگریس کے ایم ایل اے امین پٹیل،ایڈوکیٹ سید مبین،نظام الدین راعین،شمشیر خان پٹھان وغیرہ نےبھی خطاب کیا۔
