نئی دہلی، 17 نومبر (ایجنسی): ممتا بنرجی اور اروند کجریوال کے نوٹ بندی کے فیصلے کو 72 گھنٹے میں واپس لینے کے مطالبے پر جوابی حملہ کرتے ہوئے وزیر مالیات ارون جیٹلی نے کہا کہ حکومت اپنے فیصلے پر قائم ہے۔ جیٹلی نے کہا کہ نوٹ بندی کے فیصلے کو واپس لینے کا سوال ہی نہیں اٹھتا ہے۔ نامہ نگاروں سے بات چیت کے دوران جیٹلی نے کہا کہ حکومت نے 500 اور 1000 کے لیگل ٹنڈر کو ختم کیا ہے اس کے پیچھے کا مقصد کالے دھن کو باہر کرنا، ملک کے مالی نظام کو صاف و شفاف بنانا ہے۔ انھوں نے کہا کہ اس فیصلے سے بینکوں میں زیادہ پیسہ پہنچے گا، کرائم منی باہر نکلے گا، سیاست میں بھی شفافیت آئے گی۔ افسوس کی بات ہے کہ کچھ سیاسی پارٹیاں اور ریاستی حکومتیں اس میں رخنہ اندازی کر رہی ہیں۔ جہاں تک کرنسی کی دستیابی کی بات ہے میں خود بینکوں میں جا کر دیکھا ہوں کہ لوگ پیسہ جمع کر رہے ہیں اور نکال رہے ہیں۔ اے ٹی ایم کا ری کیلبریشن بھی ہو رہا ہے۔ بینک کے عملے بھی بہت محنت کر رہے ہیں۔ انھوں نے کانگریس کی مخالفت کے بارے میں کہا کہ قومی پارٹی کی شکل میں کانگریس کو ایسے فیصلوں کی حمایت کرنی چاہیے۔ وزیر اعظم نریندر مودی کی ایوان میں غیر موجودگی اور براہ راست ان سے جواب مانگے جانے کے سوال پر جیٹلی نے کہا کہ حکومت اجتماعی ذمہ داری سے چلتی ہے۔ انھوں نے کہا کہ یہ حکومت کا اختیار ہے کہ وہ کسے اس موضوع پر جواب دینے کی ذمہ داری سونپتی ہے۔