نئی دہلی، 23 نومبر (ایجنسی): اقتصادی معاملوں کے سکریٹری شکتی کانت داس نے آج کہا کہ سبھی سرکاری تنظیموں، عوامی مشنریوں اور سرکاری ایجنسیوں کو صلاح دی گئی ہے کہ تنخواہ دینے اور دیگر اخراجات کے لیے ڈیجیٹل ادائیگی کا استعمال کریں۔ اتنا ہی نہیں، داس نے یہ بھی کہا کہ 31 دسمبر تک ریلوے بھی ای-ٹکٹ بک کرانے پر سروس ٹیکس کی وصولی نہیں کرے گا۔ انھوں نے کہا کہ 31 دسمبر تک فیچر فون سے کیے جانے والے سبھی طرح کے ڈیجیٹل لین دین بھی سروس ٹیکس کے دائرے سے باہر رہیں گے۔ اس طرح کے ڈیجیٹل لین دین پر لوگوں کو کسی طرح کا سروس ٹیکس نہیں دینا پڑے گا۔
سکریٹری شکتی کانت داس نے یہ بھی کہا کہ پرائیویت اور سرکاری بینک 31 دسمبر تک ڈیبٹ کارڈ کے استعمال پر سروس ٹیکس نہیں لینے پر رضامند ہو گئے ہیں۔ اس لیے اب لوگوں کو 31 دسمبر تک ڈیبٹ کارڈ سے خریداری کرنے میں سروس ٹیکس کی ادائیگی نہیں کرنی ہوگی۔ نابارڈ نے زراعت سے متعلق قرضوں کی مدد کے لیے ضلع مرکزی کو آپریٹو بینکوں کے لیے خاص طور سے 21 ہزار کروڑ روپے کی حد کو منظوری دے دی ہے۔ اس کے ساتھ ہی انھوں نے یہ بھی کہا کہ کسانوں کو قرض اور ایک مقررہ مقدار میں نقدی دستیاب کرانے کے لیے ریزرو بینک، عام بینکوں اور نابارڈ کو کو آپریٹو بینکوں کو نقدی دستیاب کرانے کی ہدایات دے دی گئی ہیں۔