شاہ رخ خان مولانا آزاد نیشنل اردو یونیورسٹی کے چانسلر ظفر یونس سریش والا سے ڈاکٹریٹ کی اعزازی ڈگری لیتے ہوئے جبکہ سنجیو صراف او ر اسلم پرویز صاحبان کو بھی دیکھا جا سکتا ہے۔
جلسہ تقسیم اسناد پروگرام میں ملک کے معززین کی شرکت،ریختہ کے مالک سنجیو صراف بھی اعزاز لینے والوں میں شامل
حیدر آباد : بالی ووڈ کے بادشاہ شاہ رخ خان کو مولانا آزاد نیشنل اردو یونیورسٹی نے اردو زبان کی تشہیر و ترویج کے لیے ان کی خدمات کو سراہتے ہوئے ڈاکٹریٹ کی اعزازی ڈگری سے نوازاہے۔تلنگانہ کےشہر حیدر آباد میں واقع مولانا آزادنیشنل اردو یونیورسٹی کا چھٹا کو نوکیشن منعقد کیا گیا جس میں دنیا بھر میں اردو زبان کی ترویج کے لیے کام کرنے والوں کی خدمات کو سراہتے ہوئے انہیں ڈاکٹریٹ کی اعزازی ڈگریاں دی گئیں۔یونیورسٹی نے بالی ووڈ کے سپر اسٹار شاہ رخ خان کی اردو زبان کی تشہیروترویج پر ان کی خدمات کا اعتراف کرتے ہوئے انہیں ڈاکٹریٹ کی اعزازی ڈگری دی جو کسی بھی ہندوستانی یونیورسٹی کی جانب سے شاہ رخ کے لیے پہلی اعزازی ڈاکٹریٹ کی ڈگری ہے۔
شاہ رخ خان نے کونوکیشن میں عام طالب علم کی طرح گاؤن اور کیپ پہن کرشرکت کی جنہیں یونیورسٹی کے چانسلرظفر یونس سریش والا نے اعزازی ڈگری سے نوازا جب کہ اس موقع پر خطاب کرتے ہوئے شاہ رخ خان کا کہنا تھا کہ والدہ کے آبائی علاقے کی یونیورسٹی کی جانب سے ڈاکٹریٹ کی اعزازی ڈگری ملنے پرخوشی سے پھولا نہیں سما رہا ہوں جس کے لیے سب کا شکر گزار ہوں۔ انہوں نے کہا کہ اعزازی ڈگری کو اردو زبان اور تعلیم کی ترویج کے لیے ذمہ داری کے طور پر سمجھتا ہوں ۔
واضح رہے کہ گزشتہ سال بھی بالی ووڈ اسٹار شاہ رخ خان کو برطانیہ کی ایڈن برگ یونیورسٹی کی جانب سے اعزازی ڈاکٹریٹ کی ڈگری دی گئی تھی۔
