ممبئی امن کمیٹی کی آفس میں وامن مشرام حاضرین کو خطاب کرتے ہوئے جبکہ حضرت مولانا سجاد نعمانی صاحب،فرید شیخ،ڈاکٹر عظیم الدین،مولانا محمود دریابادی اور سلیم موٹر والا کو دیکھا جاسکتا ہے(تصویر:معیشت)
اپیل کنندگان میں تمام مسالک و مشارب کے ذمہ داران شامل،آزاد میدان میں ۲۵لاکھ سے زائد لوگوں کی شرکت متوقع
ممبئی:(معیشت نیوز) رحمانی فائونڈیشن کے سربراہ حضرت مولانا سجاد نعمانی،آل انڈیا علماء ایسو سی ایشن کے صدرمولانا سید اطہر علی،آل انڈیا علماء کونسل کے ذمہ دار مولانا محمود دریا آبادی،، شیعہ عالم دین اور حوضہ علمیہ نجفی ہائوس ممبئی کے سربراہ مولانا احمد علی عابدی،بوہرہ جماعت سے وابستہ شبیر نل والا،جمعیۃ علماء مہاراشٹر کے صدر مولانا مستقیم احسن اعظمی،صوبائی جمعیت اہلحدیث مہاراشٹرکے ذمہ دار مولانا عبدالسلام سلفی،ممبئی امن کمیٹی کے صدر فرید شیخ ، ایم ایچ ڈبلیو کے صدرڈاکٹر عظیم الدین،ملی کونسل سے وابستہ مفتی عبد الرحمن ملی ، جماعت اسلامی مہاراشٹرکے سلریٹری حفیظ فاروقی،ہانڈی والی مسجد کے امام و خطیب مولانا اعجاز کشمیری ، روزنامہ ہندوستان کے ایڈیٹر سرفراز آرزو،صفا اسکول کے ٹرسٹی سلیم موٹر والا،وہائٹ پیپر پبلی کیشنزکے پروپرائٹر دانش ریاض وغیرہ سمیت ممبئی کے اہم لوگوں نے اپیل کی ہے کہ وہ اپنے حقوق کی بازیابی اور اتحاد و یکجہتی کا مظاہرہ کرنے کے لیے ممبئی کے آزاد میدان میں ۲۱جنوری۲۰۱۷ کو ضرور شریک ہوں۔
رحمانی فائونڈیشن کے سربراہ مولانا سجاد نعمانی نے اپیل میں کہا ہے کہ ’’حضرات!ہمارے ملک میں ایمانی وجود اور اس کے مراکز مساجد ،مکاتب،مدارس وغیرہ کی سلامتی اور بقا ء کے لیے اور تمام دینی سرگرمیوں کے جاری رہنے کے لیے یہ ضروری ہے کہ ملک میں امن و آشتی کا ماحول رہے ، اور برادران وطن کے دل میں ہمارے لیے محبت اور اعتماد کے جذبات رہیں نہ کہ نفرت اورشک و شبہ کے جذبات رہیں۔ اگر ایک طرف کچھ لوگ ملک کی اکثریتی آبادی کے دل میں مسلمانوں سے نفرت اور بدگمانیاں پھیلانے کی کوشش کر رہے ہیں ، تو آپ کو یہ جان کر یقیناً خوشی ہوگی کہ اکثریتی آبادی ہی کے کچھ ایماندار اور سمجھ دار لوگ ملکی آبادی کو آپس میں جوڑنے کی اور خاص کر مسلمانوں کے بارے میں پھیلائی گئی غلط فہمیوں کو دور کرنے کی بھی انتھک کوشش کر رہے ہیں۔اسی کوشش کے سلسلے میں مختلف تنظیموں اور جماعتوں کے باہم تعاون اور اشتراک عمل سے ممبئی کے آزاد میدان میں ۲۱ جنوری ۲۰۱۷ کو ایک بہت اہم پروگرام ’’بہوجن کرانتی مورچہ‘‘ کے نام سے منعقد ہورہا ہے اس پروگرام میں برادران وطن کی مختلف تنظیموں کے ساتھ مسلمانوں کی سب جماعتیںبھی شریک ہیں۔اور ہمارے مختلف مسالک و مکاتب فکر کے قائدین و علماء کرام بھی خطاب فرمائیں گے۔آپ تمام سے گذارش ہے کہ زیادہ سے زیادہ تعداد میں شریک ہوکر ملک میں امن و بھائی چارہ قائم کرنے اور نفرت و خوف پھیلانے والوں کی سازشوں کو ناکام بنانے کے عظیم کام میں حصہ لیں‘‘۔
مولانا نے کہا کہ ’’یاد رکھیں! ۲۱جنوری ۲۰۱۷ بروز سنیچر آزاد میدان میں دوپہر بارہ بجے تک ضرور پہنچ جائیںانشاء اللہ نماز اور وضو کا بھی نظم کیا جائے گا‘‘۔
