ورلڈ حلال کانفرنس کوالالمپور میں معیشت میڈیا کو اعزاز

ممبئی: ملک میں معاشی بیداری پیدا کرنے اور مالیاتی اداروں کے مابین تال میل قائم کرنے کی کوششوں میں مصروف معیشت میڈیا پرائیویٹ لمیٹڈ کی عالمی پیمانے پر پذیرائی کی گئی اور ملیشیاکےکوالالمپور میں منعقدہ ورلڈ حلال کانفرنس میں مختلف اعزازات سے نوازہ گیا۔
معیشت میڈیا کےمنیجنگ ڈائرکٹر دانش ریاض کے مطابق’’گذشتہ آٹھ برسوں سے ملیشیا کی حکومت حلال انڈسٹریز کو فروغ دینے میں مصروف ہے جس کے لئے اس نے ایک ادارہ حلال انڈسٹری ڈیولپمنٹ کارپوریشن قائم کر رکھا ہے ۔اس ادارے کے تحت حلال انڈسٹری کو فروغ دینے کے لئے مختلف کام انجام دئے جا رہے ہیں جبکہ ہر سال ورلڈ حلال کانفرنس کا بھی انعقاد کیا جارہا ہے۔چونکہ معیشت میڈیا ہندوستان کا وہ واحدابلاغی ادارہ ہے جو میڈیا کے ذریعہ حلال انڈسٹری کو فروغ دے رہا ہے لہذا اس بار اسے بھی شرکت کی دعوت دی گئی اور اعزازات سے نوازہ گیا‘‘۔
دانش ریاض کے مطابق ’’معیشت میڈیا کے لئے یہ پہلا موقع تھا جب پوری دنیا سے آئےحلال انڈسٹری سے وابستہ تقریباً ۹۰۰لوگوں کے بیچ اس نے اپنا تعارف پیش کیا بلکہ حیرت اس وقت ہوئی جب پڑوسی ممالک کے مندوبین نےنہ صرف معیشت کی خدمات کا اعتراف کیا بلکہ کئی لوگوں نے یہ کہا کہ وہ پابندی کے ساتھ معیشت کی ترسیلات دیکھا کرتے ہیں‘‘۔
واضح رہے کہ نیوز پورٹل معیشت((http://maeeshat.in پر حلال انڈسٹری کے عنوان سے ایک علحدہ سیکشن قائم ہے جہاں حلال انڈسٹریز کی خبروں کا احاطہ کیا جاتا ہے۔جبکہ حلال انڈسٹری سے وابستہ افراد کی پروفائلنگ،کمپنی کا تعارف اور ساتھ ہی دیگر تفصیلات بھی دیکھی جا سکتی ہیں۔
حلال اندسٹری ڈیولپمنٹ کارپوریشن کے سی ای او داتو سری جمیل بدین نے معیشت میڈیا کے منیجنگ ڈائرکٹر دانش ریاض کو ممنٹو پیش کرتے ہوئے کہا کہ ’’معیشت نے حلال انڈسٹری کو فروغ دینے میں خاص طور سے حلال کانفرنس کو فروغ دینے کا کام بحسن و خوبی کیا ہے اور ہمیں امید ہے کہ یہ سلسلہ جاری رہے گا۔‘‘
ملیشیا کے کوالالمپور میں منعقدہ حلال کانفرنس کو جہاں وہاں کے نائب وزیر اعظم داتو سری احمد زاہد حمیدی نے خطاب کیا وہیں سلطان ناظرالدین معین الدین نے اسلامی معاشیات کے فروغ میں ملیشیا کے کردار پر گفتگو کی۔