جمعیۃ علماء مہاراشٹر کوسہ ممبرا یونٹ کی جانب سے نادار طلبہ میں اسکالر شپ کی تقسیم
ممبرا: ہندوستانی مسلمانوں کی قدیم ترین تنظیم جمعیۃعلماء مہاراشٹر (ارشد مدنی) کی کوسہ ممبرا یونٹ نے کوسہ ممبرا کے مسلم و غیر مسلم طلبہ کو رواں تعلیمی سال کے لئے تعلیمی وظائف کے چیک تقسیم کرنے کے لئے زمزم ہال (کھڑی مشین روڈ) میں ایک تقریب منعقد کی،جس میں جمعیۃ علماء مہاراشٹر کے جنرل سیکرٹری مولانا حلیم اللہ قاسمی دامت برکاتہم ، مفتی حفیظ اللہ قاسمی ناظم تنظیم جمعیۃ علماء مہاراشٹر، ممبرا پولس محکمہ کے اعلی افسر مجاور سر، شہر کے معززین ، جمعیۃ کے بہی خواہان اور جمعیۃعلماء کوسہ ممبرا کے عہدیداروں نے شرکت کی۔اس تقریب میں معزز مہمانوں اور ذمہ داران جمعیۃعلماء کے بدست طلبہ کو تقریباً پونے دو لاکھ روپئے چیک اور نقدی روپئے کی شکل دیا گیا، جس میں ابتداء سے لیکر اعلیٰ تعلیم حاصل کرنے والے طلباء شامل ہیں۔ اس موقع پر مولانا حلیم اللہ قاسمی صاحب نے جمعیۃ علماء کے دو تاریخی فیصلے متحدہ قومیت اور الیکشن کی سیاست سے دستبرداری کا ذکر کرتے ہوئے جمعیۃ کے دیگر عدیم المثال کارناموں اور علم کی اہمیت پر روشنی ڈالی، تعلیمی وظائف کے چیک کی تقسیم سے قبل ممبراپولس اسٹیشن کے سینئر پولس افسر مجاور سر نے خطاب کیا،دوران خطاب انہوں نے طلباء اور ان کے سر پرستوں کو تعلیم کی جانب توجہ دلاتے ہوئے کہا کہ جب جمعیۃ کی مخلص ٹیم آپ کے ساتھ ہے تو اعلی تعلیم دلانے سے اپنے بچوں کو پیچھے نہ رکھیں، اسی طرح روزنامہ معیشت کے ایڈیٹر دانش رریاض صاحب نے خطاب کرتے ہوئے کہا کہ ’’آپ ایک ایسے دور میں جی رہے ہیں جہاں پڑھائی کے لئے پیسہ کا نہ ہونا کوئی مسئلہ نہیں ہےکیونکہ تعلیم کے نام پر خرچ کرنے والوں کی بڑی تعداد موجود ہےلیکن المیہ یہ ہے کہ تعلیم کے میدان میں آگے آنے والے لوگوں کی کمی کا سامنا ہے، العاقب ٹور اینڈ ٹراول کے مالک نیاز ناخوا صاحب اور سماجی خدمتگار سیف پٹھان نے بھی اپنے خیالات کا اظہار فرمایا۔۔ اس تقریب میں ممبرا جمعیۃ کے صدر مولانا عبد الوہاب قاسمی ، سرپرست مولانا فرید احمد قاسمی، اراکین جمعیۃ مولانا محمد سعد قاسمی، مولانا ذاکر سابلے، مولانا شفیق الرحمن ندوی، قاضی عبد اللہ نور قاسمی، مولانا امین الاسلام، حافظ ایاز ، حافظ مخدوم حافظ عبد الحفیظ، جناب حنیف صدیقی وغیرہ نے شرکت کی ، اور صدر محترم کی پر مغز دعا پر مجلس کا اختتام عمل میں آیا ۔
