علی گڑھ : ملک میں کووِڈ- 19 کی وبا کے باعث پیدا ہونے والے حالات کے پیش نظر علی گڑھ مسلم یونیورسٹی (اے ایم یو) کے اسکولوں میں زیر تعلیم پہلی جماعت سے آٹھویں جماعت تک کے سبھی طلبہ و طالبات کو بغیر امتحان کے اگلی جماعت میں پروموٹ کرنے کا فیصلہ کیا گیا ہے ۔
اس کے علاوہ نویں اور گیارہویں جماعت کے طلبہ و طالبات کو اب تک ہوئے مختلف تعلیمی امور جیسے کہ وقفہ وقفہ پر ہونے والے ٹسٹ، ٹرم امتحانات، اسائنمٹ اور پروجیکٹ ورک کی بنیاد پر پروموٹ کیا جائے گا ۔جن طلبہ و طالبات نے کسی سبجیکٹ میں یہ امور مکمل نہیں کئے ہیں تو انھیں اسکول کی جانب سے آن لائن یا آف لائن ٹسٹ میں بیٹھنے کا موقع دیا جائے گا اور اسی بنیاد پر انھیں اگلی جماعت میں پروموٹ کیا جائے گا ۔
اے ایم یو کے ڈائرکٹر اسکول ایجوکیشن پروفیسر اصفر علی خاں نے ایک نوٹس میں یہ اطلاع دیتے ہوئے کہا کہ جہاں تک دسویں اور بارہویں جماعت کے بورڈ امتحانات کا تعلق ہے تو فی الحال حتمی طور سے کوئی اعلان کرنا مشکل ہے۔ انھوں نے کہاکہ حالات کا جائزہ لے کر اور حکومت کی رہنما ہدایات کی روشنی میں امتحان کے نئے شیڈول کا اعلان کنٹرولر امتحانات کی جانب سے کیا جائے گا ۔ انھوں نے مزید کہاکہ بورڈ امتحانات شروع ہونے سے قبل تقریباً دس دن کا وقت دیا جائے گا ۔