میڈیا سے بات کرتے ہوئے تارک راما راو نے کہا کہ وزیراعلی کے چندرشیکھر راو کی ہدایت کے مطابق تلنگانہ کے عوام کو وہ دیوالی کا تحفہ دے رہے ہیں۔ سال 2020-21 میں گریٹر حیدرآباد میونسپل کارپوریشن (جی ایچ ایم سی) کے حدود میں 15000 روپئے تک کا جائیداد ٹیکس رکھنے والوں کو 50فیصد رعایت دی جائے گی۔

تارک راماراو

یواین آئی

تلنگانہ کے وزیر بلدی نظم ونسق کے تارک راما راو نے ریاست کے عوام کو دیوالی کا تحفہ دیاہے۔ وزیرموصوف نے چیف سکریٹری سومیش کمار کے علاوہ ریاستی وزرا کے سری نواس یادو، محمد محمود علی، مئیر حیدرآباد بی رام موہن اور دیگر اعلی عہدیداروں کے ساتھ ایک جائزہ اجلاس منعقد کیا جس میں شہر سے متعلق بعض امور پر اہم فیصلے لئے گئے۔ اجلاس کے بعد میڈیا سے بات کرتے ہوئے تارک راما راو نے کہا کہ وزیراعلی کے چندرشیکھر راو کی ہدایت کے مطابق تلنگانہ کے عوام کو وہ دیوالی کا تحفہ دے رہے ہیں۔

سال 2020-21 میں گریٹر حیدرآباد میونسپل کارپوریشن (جی ایچ ایم سی) کے حدود میں 15000 روپئے تک کا جائیداد ٹیکس رکھنے والوں کو 50فیصد رعایت دی جائے گی۔ریاست کے بقیہ حصوں میں 10 ہزار روپئے تک جائیداد ٹیکس رکھنے والوں کو 50 فیصد رعایت دی جائے گی۔ اب تک جن افراد نے جائیداد ٹیکس ادا کردیا ہے، ان کے اس ٹیکس کو آئندہ سال کے ٹیکس کی رقم میں رعایت دی جائے گی۔اس کے ذریعہ ریاست کو 31.40لاکھ خاندانوں کو 326.48کروڑ روپئے کا فائدہ پہنچے گا۔ریاستی وزیر نے کہا کہ ابھی تک ریاست میں سیلاب متاثرین کی مدد کے لئے 4,57,871 خاندانوں میں 475 کروڑروپئے کی امدادی رقم تقسیم کی گئی ہے۔

سیلاب متاثرہ ایسے افراد جن کو مدد نہیں پہنچی وہ می سیوا میں اپنے نام، مکان کی تفصیلات، آدھار نمبردرج کروالیں۔ عہدیدار بنیادی سطح سے جائزہ لینے کے بعد مدد فراہم کریں گے اور اگر بینک اکاؤنٹ کی تفصیلات فراہم کی جاتی ہے تو رقم راست فراہم کردی جائے گی۔

انہوں نے واضح کیا کہ حکومت ضرورت پڑنے پر مزید 100کروڑروپئے کی مدد کے لئے بھی پیچھے نہیں ہٹے گی۔انہوں نے جی ایچ ایم سی کے سینی ٹیشن ورکرس کی تنخواہ 14500روپئے سے بڑھا کر17000روپئے کرنے کا اعلان کیا۔کوویڈ پر قابو پانے میں تلنگانہ حکومت کے اقدامات کی مرکزی وزیر ہرش وردھن نے ستائش کی ہے۔انہوں نے کہاکہ کورونا کی وجہ سے حکومتیں اور عوام معاشی مسائل کا شکار ہیں۔