سوشیل ڈیموکریٹک پارٹی آف انڈیا

بنگلور۔ (پریس ریلیز)۔ سوشیل ڈیموکریٹک پارٹی آف انڈیا (ایس ڈی پی آئی) کے ریاستی صدر عبدالحنان نے اپنے جاری کردہ اخباری اعلامیہ میں اقلیتی طلباء کی فیلوشپ میں کٹوتی کئے جانے پر سخت ناراضگی ظاہر کرتے ہوئے کہا ہے کہ پی ایچ ڈی اور ایم فل کی تعلیم حاصل کرنے والے اقلیتی طلباء کو ریاستی حکومت سالانہ 3لاکھ روپئے کی فیلوشپ دیتی تھی۔ اب کوویڈ کی وجہ بتاکر اس رقم میں کٹوتی کرکے 1لاکھ روپئے کردیا گیا ہے۔ عبدالحنان نے حکومت پر الزام لگایا ہے کہ ریاستی حکومت اقلیتی برادری کے طلباء کو دی جانے والی فیلوشپ رقم کو کم کرکے ایک مخصوص برادری کے طلباء کے مستقبل کو برباد کررہی ہے اور ان سے امتیازی سلوک برت رہی ہے۔ پی ایچ ڈی کرنے والوں کو 3سال، ایم فل کرنے والو ں کو 2سال کیلئے ماہانہ 25ہزار روپئے کی فیلوشپ مالی اعانت کے طور حکومت فراہم کرتی تھی۔ لیکن یہ رقم پچھلے دس مہینوں سے ادا نہیں کی گئی ہے۔ افسوس کی بات ہے کہ حکومت نے طلباء کو دی جانے والی فیلوشپ کی رقم میں اچانک کمی کردی ہے۔ ریاستی بی جے پی حکومت شروع سے ہی اقلیتی فلاح بہبود کے منصوبوں کیلئے امداد میں کٹوتی کرتی آرہی ہے۔سال 2020-21 کے دوران 44فیصد امداد میں کٹوتی کی گئی ہے۔اسی سلسلے کی ایک کڑی کے طور پر اب اعلی تعلیم کو دی جانے والی امدادی رقم میں کٹوتی کی گئی ہے۔ ایس ڈی پی آئی ریاستی صدر عبدالحنان نے حکومت سے مطالبہ کیاہے کہ وہ طلباء کو فورا فیلوشپ کی بقایا رقم کرنے کے ساتھ ہی طلباء کو ہمیشہ کی طرح دی جانے والی مالی اعانت کو جاری رکھے۔