ریاض : سعودی حکام کا کہنا ہے کہ رواں سال 10 لاکھ عازمین کو حج کی اجازت دی جائے گی۔ کرونا (کورونا) وائرس کی وبا کے دوران گذشتہ دو سالوں میں اس سالانہ مذہبی فریضے میں شرکت کرنے والوں کی تعداد میں انتہائی کمی واقع ہوئی تھی، تاہم اس سال دنیا بھر سے 10 لاکھ مسلمان حج کرسکیں گے۔
سعودی حکام کے مطابق عازمین حج کی عمر 65 سال سے کم ہونی چاہیے اور ان کے پاس سعودی وزارت صحت سے منظور شدہ کووڈ ویکسین کا سرٹیفیکیٹ ہونا چاہیے۔
اس کے علاوہ تمام عازمین کو مملکت روانگی کے 72 گھنٹوں قبل منفی پی سی آر ٹیسٹ پیش کرنا ہوگا۔ سعودی وزارت نے کہا ہے کہ وبا کے دوران مملکت کی طرف سے جاری کردہ صحت سے متعلق ہدایات پر عمل کرتے ہوئے اس فیصلے کا مقصد زیادہ سے زیادہ تعداد میں عازمین کو حج کی سعادت حاصل کرنے کی اجازت دینا ہے۔ حجاج کی تعداد میں یہ اضافہ صحت کی سفارشات کو مدنظر رکھتے ہوئے مختلف ممالک کے لیے مختص کوٹے کے مطابق ہوگا۔ سرکاری اعداد و شمار کے مطابق گذشتہ سال محض 58 ہزار 745 عازمین نے حج کا فریضہ ادا کیا تھا۔ وبائی مرض سے پہلے اکثر حجاج کی تعداد 20 لاکھ سے تجاوز کر جاتی تھی۔
سعودی وزارت حج و عمر کی طرف سے ہفتے کے روز جاری بیان میں کہا گیا ہے،”خادم الحرمین شریفین کے لیے جہاں اس امر کو یقینی بنانا ضروری ہے کہ دنیا بھر کے مسلمان ایک محفوظ او روحانی ماحول میں فریضہ حج ادا کرسکیں اور مسجد نبوی کی زیارت کرسکیں وہیں عازمین حج نیز مسجد نبوی کے زائرین کی صحت وسلامتی اور سکیورٹی کو یقینی بنانا بھی ان کے لیے انتہائی اہمیت کی حامل ہے۔”
عازمین حج کے لیے دیگر شرائط
بیان میں کہا گیا ہے کہ بیرون ملک سے آنے والے عازمین حج کے لیے سعودی عرب روانہ ہونے سے قبل زیادہ سے زیادہ 72 گھنٹے پہلے کا پی سی آر منفی ٹیسٹ رپورٹ جمع کرنا ہوگی۔
اس کے ساتھ ہی انہیں مکہ اور مدینہ میں قیام کے دوران کورونا وائرس کو پھیلنے سے روکنے کے لیے کیے گئے احتیاطی اقدامات پر بھی عمل کرنا ہوگا۔
خیال رہے کہ حج اسلام کے پانچ ارکان میں سے ایک ہے۔ اور ہر صاحب اسطاعت مسلمان پر زندگی میں کم از کم ایک مرتبہ حج کرنا فرض ہے۔ امید ہے کہ اس سال حج کا فریضہ جولائی میں ادا کیا جائے گا اور کوٹہ سسٹم کے تحت ہر ملک سے محدود تعداد میں مسلمانوں کو سعودی عرب آنے کی اجازت دی جائے گی۔
سال 2021 میں کووڈ انیس کی وبا کے سبب صرف چند ہزار مسلمانوں کی ہی فریضہ حج ادا کرنے کی اجازت دی گئی تھی۔ جب کہ اس سے قبل یعنی سن 2020 میں صرف ایک ہزار لوگوں کو ہی حج کی اجازت ملی تھی۔ کورونا وائرس کی وبا سے قبل ہر سال دنیا بھر سے بالعموم پچیس سے تیس لاکھ کے قریب مسلمان حج کے لیے سعودی عرب آتے تھے۔
