نئی دہلی : فروری کے مہینے میں ملک میں بے روزگاری کی شرح ۷ء۴۵؍ فیصد رہی۔ جنوری میں یہ ۷ء۱۴؍ فیصد تھی۔ اہم بات یہ ہے کہ شہری علاقوں میں بے روزگاری کی شر ح میںکمی آئی ہے جبکہ دیہی علاقوں میں شرح بڑھ گئی۔ سی ایم آئی ای سروے کے مطابق، راجستھان اور ہریانہ میں ملک میں سب سے زیادہ بے روزگاری کی شرح ہے۔ ۔
ایک اور رپورٹ کے مطابق گزشتہ مالی سال میں دیہی خواتین کی حالت میں بہتری آئی ہے۔ شہری خواتین میں بے روزگاری کی شرح زیادہ سے زیادہ ۲۷ء۹؍ فیصد تھی، جب کہ دیہی خواتین میں یہ شرح صرف ۴ء۵؍ فیصد تھی۔
مرکز اور ریاستوں میں سرکاری بھرتیوں میں ایک سال میں ۸؍فیصد کی کمی آئی ہے… ریاستوں میں بھرتی کووڈ سے پہلے کی نسبت کم ہے۔آئی ٹی سیکٹر میں عالمی سطح پر برطرفی کے باوجود ہندوستان میں ملازمتوں میں ۱۰؍فیصد اضافہ ہوا۔
’جاب اسپیک‘ کے مطابق فروری ۲۰۲۲ء کے مقابلے فروری ۲۰۲۳ء  میں ہندوستان کے آئی ٹی سیکٹر میں بھرتیوں میں ۱۰؍ فیصد اضافہ ہوا ہے۔ جبکہ دنیا بھر کے بڑے ممالک میں چھانٹی کا سلسلہ اب بھی نہیں رکا ہے۔ اس شعبے میں ماہرین کی زیادہ مانگ ہے۔ جیسے ڈیٹا اینالیٹک مینیجر، بگ ڈیٹا انجینئر، کلاؤڈ سسٹم ایڈمنسٹریٹر وغیرہ۔ نیس کام کے مطابق، ۲۰۲۳ءمیں ہندوستان کے آئی ٹی سیکٹر کا حجم ۸ء۴؍ فیصد بڑھ سکتا ہے۔