سعادتگنج،بارہ بنکی(ابوشحمہ انصاری) اللہ تبارک تعالٰی کے کرم سے رمضانِ مقدس کا با برکت مہینہ ہم سب پر سایہ فگن ہے۔ رمضان المبارک مہینے کا موسم اسلام کے مطابق موسمِ خیر و برکت ہے اس میں رحمتِ الٰہی کی گھٹائیں جھوم جھوم کر برستی ہیں، یہ وہ مبارک و مسعود مہینہ ہے جس میں اللہ تعالیٰ کا دریائے کرم جوش پر ہوتاہے، اس کی رحمت کی گھٹائیں لہرا لہرا کے اٹھتی اور جھوم جھوم کر برستی ہیں، اس مہینہ میں اس کی بندہ نوازیوں کا یہ عالم ہوتا ہے کہ وہ روز اپنی جنت کو آراستہ کرتا ہے۔مذکورہ خیالات کا اظہار کرتے ہوۓ بارہ بنکی سے شاٸع ہونے والے اردو ہفت روزہ “صداۓ بسمل” کے ایڈیٹر اور ہندستان کے مشہور و معروف انٹرنیشنل شاعر ذکی طارق بارہ بنکوی نے کہا کہ جب رمضان المبارک کا مہینہ آتا ہے تو جنت کے دروازے کھول دۓ جاتے ہیں اور جہنم کے دروازے بند کر دئے جاتے ہیں اور اسی کے ساتھ شیاطین کو بھی زنجیر میں جکڑ کر قید کر دیا جاتا ہے۔
ذکی طارق نے کہا کہ رمضان المبارک کے مقدس اور با برکت مہینے میں شیطانوں کو اس لیے قید کیا جاتا ہے کہ وہ مسلمانوں کو گناہ پر آمادہ نہ کرسکیں۔ رمضان المبارک صرف اور صرف عبادت اور ریاضت کا مہینہ ہے لیکن افسوس ہے کہ آج مسلمان رمضان المبارک کی قدر و قیمت بھلا بیٹھا ہےاور دیگر مہینوں کی طرح رمضان المبارک مہینے کے بھی قیمتی اوقات کو فضول کاموں میں برباد کردیتا ہے۔
انہوں نے کہا کہ اس ماہِ مقدس رمضان المبارک کو ہم سب غنیمت اور اللہ کی جانب سے نوازی گئی نعمت مانتے ہوۓ پوری یکسوٸی کے ساتھ اپنے گھروں پر رہ کر زیادہ سے زیادہ اپنا وقت عبادت وریاضت میں گزاریں اسی طرح ہم رمضان کی برکات سے فیضیاب ہوسکتے ہیں اور اپنی آخرت بھی سنوار سکتے ہیں نیز اللہﷻ اور رسولﷺ کے احکام پر عمل پیرا ہوسکتے ہیں اللہ ہم سب کو دینِ اسلام کے عین مطابق ماہِ رمضان برتنے والا بنا دے۔
