اسلام آباد : پاکستانی دفتر خارجہ نے نواز شریف کے دورہ ہند کا شیڈیول جاری کر دیا ہے۔ دفتر خارجہ کی جانب سے جاری کردی بیان میں بتایا گیا ہے پاکستانی وزیراعظم نواز شریف اور نریندر مودی کے درمیان ملاقات 27 مئی کو ہو گی ، خارجہ امور کے مشیر سرتاج عزیز ، سیکریٹری خارجہ اور وزیراعظم کے سیکریٹری بھی ہمراہ ہوں گے۔ وزیراعظم نواز شریف 27 مئی کی سہ پہر کو پاکستان واپس لوٹ جائیں گے ۔واضح رہے کہ 26مئی کو بی جے پی کے وزیر اعظم کے امیدوار نریندر مودی کی تقریب حلف برداری ہے ۔جس میں شرکت کے لئے ہندوستان نے پاکستانی وزیراعظم نواز شریف کومدعو کیا تھا ،کئی طرح کی قیاس آرائیوں کے بعد نواز شریف نے دعوت قبول کر لی۔ پاکستانی وزیراعظم آفس کے مطابق نواز شریف نریندر مودی کی تقریب حلف برداری میں شرکت کریں گے۔ حلف برداری کی تقریب پیر کی شام 6 بجے ہو گی۔ تقریب حلف برداری کے بعد دونوں وزرائے اعظم کے درمیان ون آن ون ملاقات بھی ہو گی۔ ملاقات میں دو طرفہ امور اور باضابطہ مذاکرات کی بحالی پر تبادلہ خیال کیا جائے گا۔
