’اچھے دن‘ لانے کی نریندر مودی کی کوششیں جاری

نئی دہلی، 22 جولائی (یو این بی): وزیر اعظم نریندر مودی نے لوگوں کے ’اچھے دن‘ لانے کی اپنی مہم کے تحت سبھی وزارتوں کو 17 نکاتی ایجنڈا بھیجا ہے۔ اس ایجنڈے میں روڈ، ریل نیٹورک سے لے کر پانی کے ذریعہ رابطہ کو اس طرح سے درست کرنے کا منصوبہ ہے کہ لوگ ملک کے کسی بھی گوشے میں 24 گھنٹے کے اندر پہنچ جائیں۔ انگریزی اخبار ’انڈین ایکسپریس‘ کی رپورٹ کے مطابق وزیر اعظم مودی نے اپنی ان دیرینہ منصوبوں کی لسٹ 10 جولائی کو سبھی وزارتوں کو بھیجی ہے۔ اس کے ساتھ ہی سبھی وزارتوں سے جولائی کے اواخر تک ان منصوبوں پر اپنا تفصیلی ’ایکشن پلان‘ پیش کرنے کے لیے کہا گیا ہے تاکہ اگست کے آخر میں مودی کے پہلے 100 دن مکمل ہونے پر ان کے 17 نکاتی ایجنڈے کا پورا خاکہ تیار رہے۔ وزیر اعظم مودی کے اس ایجنڈے میں انفراسٹرکچر اور توانائی پر خصوصی زور دیا گیا ہے۔ ساتھ ہی صحت اور روزگار کے شعبوں میں بھی بہتری کا منصوبہ ہے۔
ملک کی ریاستوں میں رابطہ پر زور دیتے ہوئے اس ایجنڈے میں مشرقی اور مغربی ساحلوں پر ’ساحلی ایکسپریس وے‘ کا نیٹورک پھیلانے کی تجویز ہے۔ ساتھ ہی ان دونوں ایکسپریس وے کو ایک دوسرے سے جوڑنے کے لیے بھی ’عرض بلد ایکسپریس وے‘ بنانے کی تجویز ہے۔ اس کے علاوہ مدھیہ پردیش سے آندھرا پردیش تک ’کانھا-کرشنا کاریڈور‘ بنانے کی بھی تجویز ہے جس میں ہائیوے، ریل نیٹورک سے لے کر گیل اینڈ آئل پائپ لائن بھی شامل ہوگی۔ اس کے ساتھ ہی شہروں میں میٹرو ریل اور بی آر ٹی سسٹم کو وسعت دینے پر خاص زور دیا گیا ہے تاکہ لوگ کافی کم وقت اور کم پیسے خرچ کر کے ایک جگہ سے دوسری جگہ پہنچ سکیں۔ رابطہ اور مواصلات میں بہتری کے منصوبہ کے تحت تجویز رکھی گئی ہے کہ ملک میں لمبی دوری کے کال کے لیے بھی وہی چارج لگے جتنا لوکل کال کے لیے لگتا ہے۔ مودی حکومت کانٹریکٹ سسٹم میں بہتری کے لیے بھی کچھ اہم اقدام کرنے والی ہے۔ اس کے تحت مزدوروں کو کانٹریکٹ کی جگہ مستقل ملازمت کی طرح کام دینے کی تجویز ہے۔
ذرائع کے مطابق وزیر اعظم نریندر مودی کے 17 نکاتی ایجنڈے میں ہر گھر تک بجلی پہنچانے کا بھی منصوبہ ہے۔ اس کے تحت شہروں میں منی گرڈ لگایا جائے گا جس کی ذمہ داری پرائیویٹ وینڈروں کو دے دی جائے گی۔ اس کے ساتھ ہی گائوں میں بھی گرڈ لگانے کا منصوبہ ہے۔ ملک میں صحت کے شعبہ میں بہتری کے لیے اس ایجنڈے میں ہر ضلع میں ایک ’ہیلتھ نالج سنٹر‘ قائم کرنے اور کمیونٹی ہیلتھ میں تین سال کا کورس شروع کرنے کا منصوبہ ہے۔