سعودی عرب، یو اے ای ،عراق اور فلسطین میں آج عیدالفطر
اسرائیل کی فوجی جارحیت کا شکار غزہ کے افراد بھی آج عید منا رہے ہیں
سعودی عرب، متحدہ عرب امارات ،اردن ،عراق ،بحرین اور مقبوضہ فلسطینی علاقوں میں شوال المکرم کا چاند نظر آ گیا ہے اور ان ممالک میں آج (سوموار 28 جولائی )کو عید الفطر منائی جا رہی ہے۔سعودی عرب کی رؤیت ہلال کمیٹی کے حکام اور عراق کے مفتی اعظم رفیع الرفاعی نے اتوار کو شوال کا چاند نظر آنے کی تصدیق کی ہے۔ ان ممالک میں اتوار کو انتیسواں روزہ تھا جبکہ ہندوستان سمیت بعض ایشیائی ممالک میںرمضان کی اٹھائیس تاریخ تھی اور سوموار کو انتیسواں روزہ ہوگا۔
واضح رہے کہ بہت سے عرب ،یورپی اور امریکی ممالک میں سعودی عرب اور متحدہ عرب امارات کے ساتھ ہی عید الفطر منائی جاتی ہے اور ان ممالک میں سعودی عرب اور یواے ای کی جانب سے ہی ہلال کی رؤیت کے اعلان پر اعتبار کیا جاتا ہے۔
العربیہ ڈاٹ نیٹ کے مطابق فلسطین کے مفتی اعظم نے بھی سوموار کو عید الفطر منانے کا اعلان کیا ہے۔فلسطینی یہ عید ایسے وقت میں منارہے ہیں جب وہ غزہ کی پٹی اور مقبوضہ مغربی کنارے میں اسرائیلی جارحیت کا شکار ہیں اور غزہ میں گذشتہ انیس روز سے جاری اسراِئیلی فوج کے فضائی اور زمینی حملوں کے نتیجے میں ایک ہزار سے زیادہ فلسطینی شہید ہوچکے ہیں اور کم سے کم چھے ہزار زخمی ہیں۔ان کی کثیر تعداد مناسب طبی سہولتیں نہ ملنے کی وجہ سے موت وحیات کی کشمکش میں مبتلا ہے۔
حماس اور دوسری فلسطینی مزاحمتی تنظیموں نے عید کے موقع پر اتوار کی دوپہر سے سوموار کی دوپہر دو بجے تک چوبیس گھنٹے کے لیے جنگ بندی کا اعلان کیا ہے جبکہ اسرائیلی فوج نے قبل ازیں بارہ گھنٹے کے لیے حملے روکے تھے اور یہ وقت ختم ہونے کے بعد دوبارہ فلسطینیوں پر فضائی اور زمینی حملے شروع کر دیے تھے۔حماس کے جنگ بندی کے اعلان کے بعد اسرائیل کی جانب سے دم تحریر کوئی ردعمل سامنے نہیں آیاہے۔ہزاروں اسرائیلی فوجیوں نے ٹینکوں اور بکتر بند گاڑیوں کے ساتھ غزہ کی پٹی کے شہروں، قصبوں اور دیہات کا محاصرہ کر رکھا ہے اور فضا سے اسرائیلی جنگی طیارے بارود کی بارش برسا رہے ہیں۔ ایسے میں نہتے فلسطینی اسرائیلی فوجیوں کی بندوقوں کے سائے میں نماز عید ادا کی اور شادیِ مرگ کے انداز میں عید منائی۔
واضح رہے کہ سعودی عرب اور مصر کے اسرائیل کے ساتھ خفیہ رابطے اور حماس کو ختم کرنے کے لئے سعودی عرب کی جانب سے دی جانے والی امداد نے فلسطینیوں کو بر انگیختہ کردیا ہے۔المیہ یہ ہے کہ سعودی عرب ایک طرف جہاں اسرائیل کو فنڈ فراہم کررہا ہے وہیں دوسری طرف عالم اسلام کے خوف سے غزہ کے لوگوں کو بھی امداد دینے کا اعلان کررہا ہے۔