نئی دہلی، (یو این بی): مودی حکومت نے فوج کے تینوں شعبے یعنی بری فوج، بحریہ اور فضائیہ کے لیے 20 ہزار کروڑ روپے کے دفاعی اسلحہ خرید تجاویز کو جمعہ کے روز منظوری دے دی۔ مرکزی وزیر دفاع ارون جیٹلی کی قیادت والی اعلیٰ دفاعی خریداری کونسل نے تقریباً چار گھنٹے چلی میٹنگ میں کئی دفاعی تجاویز کو منظوری دی۔ ان میں آرمی کے لیے 118 ارجن مارک-2 ٹینک اور جدید مواصلاتی مشین، فضائیہ کے لیے ’شنوک‘ اور ’اپاچے‘ ہیلی کاپٹر، بحریہ کے لیے 16 ملٹی رول ہیلی کاپٹر اور آبدوز سے مار کرنے والا جنگی نظام شامل ہیں۔ اس دوران مرکز نے بیرون ملکی کمپنیوں سے 197 ہیلی کاپٹروں کو خریدنے کی تجویز کو خارج کر دیا اور ان ہیلی کاپٹروں کو باہری ٹیکنالوجی کی مدد سے ہندوستان میں ہی بنانے کا فیصلہ لیا۔ دفاعی ذرائع کے مطابق مودی حکومت کے اس فیصلے سے ملک کی دفاعی صنعت میں 40 ہزار کروڑ روپے کے نئے مواقع پیدا ہوں گے۔
محکمہ دفاع کے ذرائع کا کہنا ہے کہ بحریہ کے لیے 1770 کروڑ روپے کے خرچ سے ’اینٹی سب مرین وار فیئر سسٹم‘ حاصل کرنے کی تجویز کو دفاعی خریداری کونسل کی ہری جھنڈی مل گئی ہے۔ اس کے تحت بحریہ مربوط آبدوز مخالف جنگی نظام سے لیس ہوگی۔ یہ بحریہ کے 11 جنگی جہازوں پر لگائی جائیں گی جن میں پروجیکٹ 17 الفا کے سات اور پروجیکٹ 15 بی کے چار جہاز شامل ہیں۔ بحریہ کے آبدوز بیڑے میں نئی جان پھونکنے کے لیے کونسل نے 4800 کروڑ روپے کے خرچ سے چھ آبدوزوں کو تیار کرنے کی تجویز بھی منظور کر لی۔ ان میں چار کلو کلاس کے سندھو آبدوز اور 2 ’ششو مار Y سیریز‘ کی ایچ ڈی ڈبلیو آبدوز شامل ہیں۔ ان میں کلو کلاس کے دو آبدوز روس بھیجے جائیں گے جب کہ ’ششو مار Y سیریز‘ کے دو آبدوز کا اَپ گریڈیشن ہندوستان میں ہی ’مجھ گاﺅں گودی‘ میں ہوگا۔ اس کے ساتھ بحریہ کے لیے 16 ملٹی رول ہیلی کاپٹروں کی تجویز کو بھی کونسل کی ہری جھنڈی مل گئی ہے۔ یہ ہیلی کاپٹر 1800 کروڑ روپے کے خرچ سے خریدے جائیں گے۔
علاوہ ازیں دفاعی ذرائع کے مطابق فضائیہ کے لیے 15 ہیوی لفٹ شنوک ہیلی کاپٹروں اور 22 اپاچے اٹیک ہیلی کاپٹروں کی خریداری کا راستہ ہموار ہو چکا ہے او ران سے جڑے سرمایہ کاری تجاویز میں کچھ رد و بدل کو منظور کر لیا گیا ہے۔ یہ دونوں سودے تقریباً ڈھائی ارب ڈالر کے ہیں۔ جہاں تک بری فوج کی بات ہے، اس کے لیے 66 کروڑ روپے کی لاگت سے ارجن مارک-2 ٹینکوں کی خریداری اور 820 کروڑ روپے کی لاگت سے ارجن ٹینکوں پر لگائے جانے والی 40 ’سیلف پروپیلڈ‘ توپوں کے فروغ کی تجویز کو بھی منظوری مل گئی۔ فوج کی 3، 4 اور 14 کور کے لیے 900 کروڑ روپے کی لاگت سے مواصلاتی مشینوں کی خریداری کی تجویز بھی کونسل نے منظور کر لی۔
