مہاراشٹر میں مسلم نمائندگی گھٹ کر ۹ ہوگئی
ممبئی : ۱۹؍ اکتوبر (معیشت نیوز) ریاست مہاراشٹر کے اسمبلی انتخابات میں مسلم ممبران اسمبلی کی تعداد گھٹ کر 10 سے 09 ہوگئی ہے لیکن ساتھ ہی ساتھ تین نئے مسلم چہروں کی بھی ریاست ِ اسمبلی میں شمولیت ہوئی ہے۔ جس میں سے دو کا تعلق مجلس اتحاد المسلمین سے ہے جبکہ ایک رکن آصف رشید شیخ کا تعلق کانگریس سے ہے جنہوں نے سابقہ اسمبلی رکن و عالم دین مفتی محمد اسمعٰیل کو پاورلوم شہر مالیگائوں سے شکست دے کر ایوان کی رکنیت حاصل کی ہے۔
سابقہ اسمبلی میں کانگریس سمیت دیگر سیاسی پارٹیوں میں کل ۱۰؍ ممبران تھے اور ان تمام ۱۰؍ ممبران میں ان انتخابات میں حصہ لیا تھا لیکن سابقہ اسمبلی کے ۳؍ مسلم ممبران کو شکست کا سامنا کرنا پڑا جس میں این سی پی کے سینئر رکن نواب ملک، کانگریس لیڈر بابا صدیقی اور این سی پی کے ہی امیدوار رشید طاہر مومن شامل ہیں۔
حالیہ اسمبلی میں جن ۹؍ مسلم ممبران کو فتح حاصل ہوئی ہے اُن کے نام اس طرح سے ہیں۔
۱۔ امین پٹیل( کانگریس)
۲۔آصف رشید شیخ (کانگریس)
۳۔ محمد عارف نسیم خان( کانگریس)
۴۔ ابو عاصم اعظمی (سماج وادی پارٹی)
۵۔ایڈوکیٹ وارث پٹھان ( مجلس اتحاد الالمسلمین)
۶۔ اسلم شیخ (کانگریس)
۷۔ امتیاز جلیل ( مجلس اتحاد الالمسلمین)
۸۔ حسن مشرف( این سی پی)
۹۔ عبدالستار شیخ (کانگریس)
کانگریس این سی پی سمیت مختلف سیاسی پارٹیوں میں مسلم نمائندوں کو ٹکٹیں دی تھیں لیکن سب سے زیادہ کانگریس کے ہی مسلم نمائندگان کو کامیابی حاصل ہوئی جس میں سابق اقلیتی وزیر محمد عارف نسیم خان، مولانا آزاد مالیاتی کارپوریشن کے سابق چیئرمین امین پٹیل اور دیگر شامل ہیں۔
این سی پی کی جانب سے صرف ایک مسلم نمائندے کو کامیابی حاصل ہوئی جن کا تعلق کولہاپور شہر کے کاگل نامی حلقے انتخاب سے ہے۔ حسن مشرف سابقہ حکومت میں وزیر محنت تھے اُن کا شمار این سی پی کے اہم لیڈران میں ہوتا ہے۔ کانگریس نے کل ۱۸؍ مسلم اُمیدواروں کو ٹکٹیں دی تھیں جبکہ این سی پی نے ۱۷؍ مسلم اُمیدواروں کو ٹکٹیں دی تھیں اسی طرح سے بی جے پی نے سابق قانون ساز کونسل رکن پاشا پٹیل کو ٹکٹ دی تھی لیکن اُنہیں بھی شکست کا سامنا کرنا پڑا۔ شیوسینا نے بھی ایک مسلم اُمیدوار کو ٹکٹ دی تھی لیکن اُس کی کارکردگی مایوس کن رہی اور اُس کی ہار ہوئی۔
ان انتخابات میں کانگریس کے ایک سابق کابینی وزیر الحاج انیس احمد بھی قسمت آزمائی کررہے تھے لیکن اُن کے مقابل بی جے پی کے اُمیدوار کو کامیابی حاصل ہوئی اُسی طرح سے ریاستی کانگریس کے شعبہ اقلیت کے سربراہ و سابق رکن قانون ساز کونسل ایم ایم شیخ کو بھی اورنگ آباد سے شکست حاصل ہوئی۔