نئی دہلی، 7 دسمبر (ایجنسی): نوٹ بندی کے بعد 130 کروڑ روپے کی نقدی اور زیورات ضبط کیے گئے ہیں۔ اس کے علاوہ انکم ٹیکس دہندگان نے تقریباً 2000 کروڑ روپے کے بے حسابی رقم کا انکشاف کیا ہے۔ انکم ٹیکس محکمہ نے بتایا کہ تقریباً 30 معاملے انفورسمنٹ ڈائریکٹوریٹ (ای ڈی) اور سی بی آئی کو آگے جانچ کے لیے سپرد کیے گئے ہیں۔ سی بی ڈی ٹی نے بیان میں کہا کہ محکمہ نے 8 نومبر کے بعد تقریباً 400 معاملوں میں ’تیز تحقیقات‘ کی ہے۔ محکمہ ¿ ای ڈی اور سی بی آئی کے ذریعہ گڑبڑیوں کا پتہ لگانے کے لیے بھرپور کوششیں کی جا رہی ہیں۔ سی بی ڈی ٹی نے کہا ”انکم ٹیکس قانون سے آگے سنگین بے ضابطگیاں سامنے آنے کے بعد ایسے معاملوں کو انفورسمنٹ ڈائریکٹوریٹ اور سی بی آئی کے پاس بھیجنے کا فیصلہ کیا گیا ہے جو ان میں مجرمانہ معاملوں کی جانچ اور ضروری کارروائی کریں گے۔ 30 سے زائد معاملے ای ڈی کے پاس پہلے ہی بھیجے جا چکے ہیں اور انھیں سی بی آئی کو بھی بھیجا جا رہا ہے۔“
قابل ذکر ہے کہ ریزرو بینک کے ایک اعداد و شمار کے مطابق 27 نومبر تک بینکوں میں 8.45 لاکھ کروڑ روپے کے پرانے نوٹ جمع کرائے گئے تھے۔ ای ڈی اور سی بی آئی کو بھیجے گئے معاملوں کی تفصیلات پیش کرتے ہوئے سی بی ڈی ٹی نے کہا کہ اس کی ممبئی یونٹ نے ایک ایسا معاملہ بھیجا ہے جس میں 80 لاکھ روپے کے نئے بڑے نوٹ پکڑے گئے ہیں۔ بنگلورو کی تفتیشی یونٹ نے سب سے زائد 18 معاملے ای ڈی کو بھیجے ہیں۔ یہ ایسے معاملے ہیں جن میں بڑی مقدار میں نئے بڑے نوٹ ضبط کیے گئے ہیں۔