نئی دہلی، 12 دسمبر: صدر جمہوریہ جناب پرنب مکھرجی نے راشٹر پتی بھون میں کیلاش ستیارتھی چلڈرنس فاؤنڈیشن کی جانب سے منعقدہ ’’سو ملین کے لیے سو ملین ‘‘ مہم کا اپنے 81 ویں یوم پیدائش کے موقع پر آ غاز کیا ۔ اس موقع پر اظہار خیال کرتے ہوئے صدر جمہوریہ نے کہا کہ راشٹر پتی بھون جو کہ ہمارے جمہوریہ کی جمہوریت، تکثیریت اور سیکولرزم کا عکاس ہے ، سے نوبل انعام یافتہ جناب کیلاش ستیارتھی کی قیادت میں چلنے والی مہم کا آغاز کرتے ہوئے بہت خوشی ہورہی ہے ۔

صدر جمہوریہ نے کہا کہ سائنس اور ٹکنالوجی اور دنیا میں معاشی ترقی کے باوجود ابھی بھی سو ملین بچے اسکول جانے سے محروم ہیں ۔ انہیں اپنے بچپن سے محروم کیا جارہا ہے اور مختلف طریقے سے ان کا استحصال ہو رہا ہے ۔ دنیا کو بغیر کسی تاخیر کے یہ اعتراف کرنا چاہیے اور جب تک ہمارے بچے محفوظ نہین تب تک کوئی ترقی نہیں ہوسکتی ۔ جب تک انسانیت کی بہتری کے لیے انہیں آزاد اور مواقع فرہم نہیں کئے جاتے تب تک ترقی ممکن نہیں۔ ان کے لیے ایک روشن اور تابناک اور غریبی اور تشدد سے عاری مستقبل کو یقینی بنانا ہمارا فرض اولین ہے ۔

صدر جمہوریہ نے کہا کہ 100 ملین حاشیہ بردار بچوں کے مستقبل کو بہتر بنانے کی غرض سے 100 ملین نوجوانوں کو اکٹھا کرنے کی یہ عالمی کوشش ایک تبدیلی کی شروعات ہے ۔ یہ مناسب ہے کہ اس مہم کی ابتدا ہندوستان سے ہورہی ہے جو کہ نوجوانوں کی سب سے بڑی آبادی والا ملک ہے ۔

’’100 ملین کے لیے 100 ملین‘‘ مہم کا مقصد دنیا کے 100 ملین حاشیہ بردار بچوں کی بچہ مزدوری ، غلامی ، تشدد سے نجات اور انہیں آئندہ پانچ برسوں میں محفوظ ، آزاد اور تعلیم یافتہ بنانے کی غرض سے 100 ملین نوجوانوں کو اکٹھا کرنا ہے ۔