اخلاص انٹرنیشنل ٹورس کے مالک شاہ رخ سلطان

سوشیل میڈیا پر گشت کررہے تمام الزامات کواخلاص انٹرنیشنل ٹورس کے مالک شاہ رخ سلطان نے مسترد کیا اورثبوت کے طور پر میڈیا کے سامنے تمام شواہد پیش کیے۔
ممبئی : کرلا میں واقع اخلاص انٹر نیشنل ٹورس نامی کمپنی جو گزشتہ دس سالوں سے حج عمرہ کی خدمات مہیا کررہی ہے ، حال ہی میںسوشیل میڈیا پر پھیلائی جانے والی غلط خبر کی نئی شکار بن گئی۔ سوشیل میڈیا پر یہ افواہ گردش کررہی تھی کہ اخلاص انٹرنیشنل ٹورس کے مالکان حاجیوں کے پیسے لے کرا ور دفتر بند کرکے فرار ہوگئے ۔ معلومات کے مطابق مذکورہ ٹور آپریٹر کے ذریعے سعودی قونصلیٹ میں جمع کیے گئے پاسپورٹ پر کچھ ناگزیر وجوہات کی بنا پر ویزا نہیں لگ سکا جس کی وجہ سے ان کے حاجی مکمل پیسہ ادا کردینے کے باوجود حج کی سعادت سے محروم رہ گئے۔ مگر متاثرہ عازمین حج کی بات کریں تو کرلا کی تکیہ واڈ مسجد کے نائب امام قاری محمدزبیر جو خود اس کا شکار ہوئے کے مطابق یہ کہنا غلط اور بے بنیاد ہے کہ اخلاص ٹورس کے مالکان جعلساز یا دھوکہ باز ہیں۔ قاری زبیر احمد کے مطابق ’ ’جب مجھے لوگوں سے اس کی اطلاع ملی تو میں فوراً ان کے دفتر میں پہنچا اور میں نے دیکھا کہ دفتر میں اس کے مالک شاہ رخ سلطان اور تمام اسٹاف موجود تھے ۔انہوں نے ہمیں تمام کاغذات دکھائے اور ہمیں مطمئن کرتے ہوئے سمجھایا کہ ہمارا ویزہ کیوں نہیں لگ سکا۔ کلمبولی کے ایک اور متاثرہ شخص عریز احمد خان کہتے ہیں کہ ـ’’جب ہمیںیہ خبر ملی کہ ہم حج پر نہیں جا سکتے تو میں اخلاص ٹورس کے دفتر پہنچا ، صورت حال جاننے کے بعد ہمارے گروپ کے دوافراد کو انہوں نے پورا پیسہ لوٹا دیا اور باقی پانچ نے آئندہ سال اخلاص ٹورس ہی کہ ذریعے حج پر جانے کا فیصلہ کیا۔
’’حج اسلام کے پانچ بنیادی ارکان میں سے ایک اہم رکن ہے جس کی ادائیگی سال میں صرف ایک بار ہی کی جا سکتی ہے اورکتنے لوگ ہیں جو ا س سعادت کے حصول کے لیے پورا سال رقم جمع کرتے ہیں۔ ہمارے عازمین کا حج ویزا قونصلیٹ میں کچھ وجوہات کی بنا پر نہیں لگ سکا جو ہماری دسترس میںنہیں تھا۔ ہم ان تمام لوگوں کی رقم انہیں لوٹا رہے ہیں حالانکہ کئی حاجی ہیں جو ہمارے ساتھ آئندہ سال حج پر جانے کے لیے تیار ہیں ، ہم انہیں انشاء اللہ آئندہ سال تمام ضروری کاروائیوں کے بعد حج بیت اللہ پر لے جائیں گے۔‘‘ اخلاص انٹر نیشنل ٹورس کے مالک شاہ رخ سلطان نے کہا۔
ایک پریس کانفرنس میں صحافیوں سے با کرتے ہوئے شاہ رخ مزید کہتے ہیں ’’ہم مسلسل اپنے بار ے میں سوشیل میڈیاپرگردش کررہی دھوکہ دہی اور جعلسازی کی بے بنیاد خبریں پڑھتے رہے مگر الحمد للہ ہم خدمت کے جذبے سے جمے رہے جس کی بنیاد پر ہم نے پچھلے دس سالوں سے اپنا ایک مقام بنایا ہے ۔ہم نے ان نا معلوم افراد کے خلاف جنہوں نے ہماری شبیہ کو داغدار کرنے کی منصوبہ بندی کی پولس کے سائبر سیل میں اپنی شکایت بھی درج کرادی ہے ۔ ہم نہ فرار ہوئے اور نہ ہی اپنا دفتر بند کیے ، بلکہ ان تمام متاثرہ عازمین کو نہ صرف تسلی بخش جواب دیتے رہے بلکہ ہم نے نصف کے قریب حاجیوں کو ان کی رقومات بھی ادا کردی۔اخلاص ٹورس اپنے تمام گاہکوں کے ساتھ رابطے میں ہے اور ان کے تعاون اور ہماری مجبوریوں کو سمجھنے کے لیے ان کا شکر گزار ہے‘‘۔