• ’ایپل‘ فون کے سپلائرز بھارت میں آئی فون بنائیں گے،۱۴؍سپلائرز کو منظوری ملی

ایپل کے لیے آئی فونز، دیگر آلات اور اجزاء کے ایک درجن سے زیادہ چائنیز سپلائرز کو ہندوستان میں توسیع کے لیے ابتدائی منظوری مل گئی ہے۔ بہت جلد یہ سپلائرز بھارت میں مینوفیکچرنگ شروع کر دیں گے۔ حکومتی ذرائع کے مطابق اہم حکومتی وزارتوں سے منظوری ملنے کے بعد ان کمپنیوں کو ہندوستان میں جوائنٹ وینچر پارٹنرز تلاش کرنےہوں گے۔ تقریباً 14 سپلائرز کو حکومت ہند سے گرین سگنل مل گیا ہے۔
ایپل نے ان کمپنیوں میں اپنے نام شامل کیے ہیں جن کی خدمات اسے ہندوستان میں اپنی موجودگی کو بڑھانے کے لیے درکار ہوں گی۔ یہ 14 کمپنیاں ہندوستان آنے کی منظوری ملنے سے ایپل کو چین سے باہر توسیع کرنے میں مدد ملے گی۔فی الحال ۵؍فیصد سے بھی کم ’آئی فونز‘ ہندوستان میں بنتے ہیں۔ساؤتھ چائنا مارننگ پوسٹ کے مطابق، ایپل نے اپریل اور دسمبر 2022 کے درمیان ہندوستان سے 2.5 بلین ڈالر کے آئی فون برآمد کیے ہیں۔ یہ پچھلے مالی سال کے مقابلے میں تقریباً دوگنا ہے۔ جے پی مورگن نے پہلے اندازہ لگایا تھا کہ ہندوستان 2025 تک دنیا کے 25 فیصد آئی فونز اسمبل کر سکتا ہے۔
ایپل بھارت میں اپنے جدید ترین آئی فون ماڈلز بھی اسمبل کر رہا ہے۔ ان میں آئی فون ایس ای، آئی فون 12، آئی فون 13 اور آئی فون 14 (بیسک) شامل ہیں۔ تاہم، ملک میں فروخت ہونے والے تمام پرو ماڈلز درآمد کیے جاتے ہیں۔ امریکی کمپنی نے پچھلے سال بھارت میں آئی فون کے جدید ترین ماڈلز کو اسمبل کرنا شروع کیا تھا۔ اس سے پہلے فاکس کان سمیت دیگر سپلائرز نئے ماڈلز تیار کرتے رہے ہیں۔

۔۔۔۔۔۔۔۔۔۔۔۔۔