تشکیل شدہ یونٹیوں کو مضبوط کرنے کا لیا گیا عزم
کشن گنج 20/ جنوری : ادارہ مکیہ کشن گنج میں مجلس علمائے ملت کشن گنج کی شوریٰ کی ماہانہ میٹنگ کا انعقاد عمل میں آیا جس کی صدارت مولانا الیاس مخلص صدر مجلس احرار اسلام صوبہ بہار نے فرمائی، نظامت مولانا شمیم ریاض ندوی محرک مجلس علمائے ملت کی رہی۔تلاوت کلام اللہ سے نشست کا آغاز ہوا۔ میٹنگ میں چند اہم ایجنڈے پاس ہوئے جن میں سے ایک یہ ہے کہ مجلس علمائے ملت کی جانب سے ایمبولینس کے لیے لی گئی گاڑی کو باضابطہ جاری کرنے کا عزم لیا گیا، جس کے لیے گاڑی کا مقام بیلوا طے پایا، ایمبولینس کی گاڑی بیلوا میں رہے گی جو مولانا نور الزماں رحمانی امام و خطیب جامع مسجد بیلوا اور مولانا اظہار ذمہ دار مجلس علمائے ملت ہالامالہ کی نگرانی میں مریضوں کی خدمت انجام دے گی۔ اس کے علاوہ پرانی تشکیل شدہ یونٹوں کو مضبوط کرنے کا عزم لیا گیا جس کے لیے وفد بناکر جانے کی ترتیب بنائی گئی۔ مولانا الیاس مخلص نے کہا کہ نئی یونٹوں کی تشکیل سازی سے اہم پرانی یونٹوں کو فعال بنانا ہے؛ لہذا اس پر توجہ مرکوز کی جائے۔ مولانا شمیم ریاض ندوی نے کہا کہ مجلس علمائے ملت کی طرف سے ملت کوچنگ سینٹر کا آغاز بھی کیا جانا ہے جس کے لیے شہر کشن گنج میں ماسٹر سفیر الدین راہی اور ماسٹر اورنگزیب اور دیگر ٹیچر حضرات اپنی خدمت دینے کے لیے تیار ہیں، ہمیں صرف بچوں کا انٹرینس کی بنیاد پر انتخاب کرنا ہے اور ان کے خرچ کا انتظام کرنا ہے، اس پر یہ طے پایا کہ امسال صرف اس کی بات چلائی جائے اور لوگوں تک اس پیغام کو عام کیا جائے اور آئندہ سال سے باضابطہ انٹرینس لے کر کام شروع کردیا جائے، اس سے پہلے پرانی یونٹوں کو فعال بنا دیا جائے تو یہ کام اور آسان ہوجائے گا۔میٹنگ میں موجود مفتی عدنان امام و خطیب جامع مسجد مدینہ مارکیٹ، مفتی نبیل قاسمی، مولانا آفتاب اظہرؔ صدیقی، مولانا نور الزماں رحمانی، مولانا اظہار، مولانا عبدالوکیل قاسمی، قاری مناظر احسن اور قاری انظر جمال نے بھی اپنے قیمتی مشورے پیش کیے۔