غیر ملکی سرمایہ کار ہندوستانی اسٹاک مارکیٹ سے پیسہ نکال کر چین میں کیوں لگارہےہیں؟
نئی دہلی: غیر ملکی سرمایہ کاروں نے اس ماہ چین کی منڈیوں کی بڑھتی ہوئی کشش اور امریکی معیشت کے کساد بازاری میں جانے کے خدشات کے سبب تیزی سے اپنا پیسہ امریکہ اور ہندوستان سے نکال کر چین میں سرمایہ کاری کررہےہیں۔غیر ملکی سرمایہ کاروں نے اس ماہ اب تک اسٹاک مارکیٹوں سے خا لص ۱۵؍ہزار ۲۳۶؍ کروڑ روپے نکال لیے ہیں۔ تاہم، گزشتہ چار تجارتی سیشنز میں، غیر ملکی سرمایہ کاروں نے خریداری کی ہے ۔ اس سے پہلے دسمبر میں ’ایف پی آئی‘ نے سٹاک مارکیٹوں میں ۱۱؍ہزار ۱۱۹؍کروڑ اور نومبرمیں ۳۶؍ہزار ۲۳۹؍ کروڑ روپے ڈالے تھے۔ FPI کی سرمایہ کاری کے لحاظ سے 2022 بدترین سال رہا ہے۔ 2022 میں، اس نے اسٹاک مارکیٹ سے زبردست طور پر پیسے نکالے ۔مجموعی طور پر، FPIs نے سا ل ۲۰۲۲ء میں ہندوستانی اسٹاک مارکیٹوں سے ایک لاکھ ۲۱؍ہزار کروڑ روپے نکالے تھے۔ اس کی بنیادی وجہ عالمی سطح پر مرکزی بینکوں کی طرف سے شرح سود میں اضافہ، خام تیل کی قیمتوں میں اتار چڑھاؤ اور روس یوکرین جنگ کے دوران اشیاء کی اونچی قیمتیں ہیں۔
۔ جبکہ گزشتہ تین سالوں کے دوران انہوں نے شیئرز میں خالص سرمایہ کاری کی تھی۔ ڈپازٹری ڈیٹا کے مطابق، FPIs نے اس ماہ (20 جنوری تک)۱۵؍ہزار ۲۳۶؍کروڑ روپے کی خالص واپسی کی ہے۔ ایف پی آئی کی فروخت کی بنیادی وجہ لاک ڈاؤن کے بعد چینی مارکیٹوں کا جارحانہ طور پر دوبارہ کھلنا ہے۔
ہمانشو سریواستو، ایسوسی ایٹ ڈائریکٹر – منیجر ریسرچ، مارننگ اسٹار انڈیا، نے کہا کہ زیرو کوویڈ پالیسی کی وجہ سے چین نے سخت لاک ڈاؤن نافذ کیا۔ جس کی وجہ سے چینی مارکیٹ نیچے آگئی۔ اس لیے وہاں سرمایہ کاری قدر کے نقطہ نظر سے زیادہ پرکشش ہو گئی ہے۔ انہوں نے مزید کہا کہ اس کی وجہ سے، ایف پی آئیز بھارت جیسی اعلیٰ قدر کی مارکیٹوں سے باہر نکل رہے ہیں۔ سریواستو نے کہا کہ اس کے علاوہ امریکی معیشت کے کساد بازاری میں جانے کے بارے میں مسلسل تشویش پائی جاتی ہے، جسے مایوس کن امریکی اعداد و شمار نے مزید سہارا دیا ہے۔
وی کے وجے کمار، چیف انویسٹمنٹ سٹریٹجسٹ، جیوجیت فنانشل سروسز، نے کہا، “ڈالر انڈیکس میں مسلسل گراوٹ کو دیکھتے ہوئے، FPIs کی مسلسل فروخت قدرے حیران کن ہے۔ ڈالر انڈیکس اپنی 2022 کی چوٹی 114 سے کم ہو کر اب 103 کے قریب آ گیا ہے۔ ڈالر کا گرنا ابھرتی ہوئی منڈیوں کے حق میں ہے اور اس لیے ہندوستان کو سرمایہ کاری ملنی چاہیے تھی۔ انہوں نے کہا کہ جو ہو رہا ہے وہ یہ ہے کہ FPIs سستے بازاروں جیسے چین، ہانگ کانگ، جنوبی کوریا اور تھائی لینڈ میں بہت زیادہ سرمایہ کاری کر رہے ہیں اور وہ ہندوستان جیسی نسبتاً مہنگی مارکیٹوں میں فروخت کر رہے ہیں۔ ایکوئٹی کے علاوہ، غیر ملکی پورٹ فولیو سرمایہ کاروں نے بھی اس ماہ قرض یا بانڈ مارکیٹ سے ایک ہزار ۲۸۶؍کروڑروپے نکالےہیں۔