ڈی بی کاسار (آئی جی اے سی ریلوے) بہترین خدمات کے عوض صدرجمہوریہ پولیس میڈل سرفراز
کولکاتہ: ہندوستان کی 74ویں یومِ آزادی کے موقع پر جنوب مشرقی ریلوے کے آئی۔جی۔ و چیف سیکوریٹی کمشنر ریلوے پروٹیکشن فورس کولکاتہ دیویندر ناتھ کاسار کو ان کی بہترین خدمات و کارکردگی کے لئے پولس میڈل سے سرفراز کیا گیا۔ دیویندر ناتھ کاسار فی الوقت جنوب مشرقی ریلوے کے ہیڈکوارٹر گارڈن ریچ کولکاتہ میں تعینات ہیں۔ کاسار صاحب نے 1990 میں یو۔پی۔ایس۔سی امتحان میں کامیابی کے بعد بطورِ معاون سیکورٹی کمشنر کے عہدے سے اپنی ملازمت کا آغاز کیا تھا۔ 28 برس کی طویل مدتی خدمت میں عمدہ کارکردگی کے لئے انھیں کئی ایوارڈ سے سرفراز کیا جا چکا ہے۔ جرائم پر روک لگانے اور مسافروں کو بہترین خدمات فراہم کرنے کے لئے انہیں امسال صدر جمہوریہ پولس بہادری کا ایوارڈ تفویض کیا گیا۔ اس سے قبل انہیں چار مرتبہ جی۔ایم۔ و ڈی۔جی۔ ایوارڈ، فیڈریشن آف انڈین چیمبرس آف کامرس کے ذریعے اسمارٹ پولیسنگ ایوارڈ اور 2013 میں انڈین پولس میڈل سے نوازا جا چکا ہے۔
موصوف نے 2008 میں ایک خصوصی مہم “آپریشن ایگل” انجام دی تھی جسکا مقصد ریلویز میں جاری خواتین اور بچوں کی انسانی اسمگلنگ (ہیومن ٹریفکنگ) پر روک لگانا تھا۔ اس قابلِ ذکر کارنامہ کی انجام دہی پر میڈیا نے محترم کی کافی پذیرائی کی تھی اور ریلوے بورڈ نے اس کارنامہ پر مختلف انعامات سے نوازا تھا۔ 2013 میں “آپریشن ریور فلو” کے ذریعے جھارکھنڈ، مغربی بنگال اور اوڈیشہ جیسی ریاستوں میں جاری نکسلی سرگرمیوں اور جنگلی مصنوعات کی اسمگلنگ پر کاری ضرب لگائی تھی۔2017 میں “ننھے فرشتے” نامی مہم کے ذریعے بچوں کی اسملنگ کو روکنے کی کامیاب مہم چلائی اور 2300 بچوں کے اسمگلروں کے چنگل سے آزاد کرواکر ان کے سرپرستوں کے حوالے کیا۔موجودہ کوڈ-19 وباءکے لاک ڈاو ¿ن پیریڈ کے دوران ضرورت مند افراد کی امداد کا اہم کام انجام دیا ساتھ ہی جدید آلات کے ذریعے لاک ڈاو ¿ن کے اصولوں کی نگرانی کی۔