جامع مسجد پٹنہ جنکشن میں مولانا الیاس مخلص کا خطاب
پٹنہ، 24/ فروری:  مجلس احرار اسلام صوبہ بہار کے صدر اور جمعیۃ علماء ضلع کشن گنج کے قائم مقام صدر مولانا الیاس مخلص نے پٹنہ جنکشن کی جامع مسجد میں جمعے کا خطبہ دیا جس میں انہوں نے علمائے کرام کی عظمت اور جنگ آزادی میں علمائے کرام کے کردادر پر روشنی ڈالی۔ انہوں نے کہا کہ جنگ آزادی میں ٹیپو سلطانؒ کی شہادت کے بعد سب سے پہلے شاہ عبدالعزیز محدث دہلوی نے انگریز کے خلاف فتویٰ دیا تھا، اسی فتوے کی روشنی میں ہندوستان کے علماء نے انگریزوں سے جنگ کی، علمائے کرام کسی بھی اتحاد اور کسی بھی مصالحت کے تحت انگریز کے ساتھ رہنے کو تیار نہیں تھے۔ جنگ آزادی میں تقریبا پانچ لاکھ مسلمان شہید ہوئے جن میں اکیاون ہزار علمائے کرام کو سزائے موت دی گئی، چاندنی چوک سے لے کر دور دور تک علماء کرام کے سر درختوں پر لٹکائے گئے، انگریز ظالموں نے علمائے کرام پر ظلم و بربریت کی انتہا کردی؛ لیکن یہ علماء ٹس سے مس نہیں ہوئے اور اپنے موقف پر قائم رہے۔ مولانا مخلص نے کہا کہ 1919ء؁ میں جمعیۃ علماء کا قیام ہوا اور 1920ء؁ میں اسیر مالٹا شیخ محمود حسن اور مولانا حسین احمد مدنی مالٹا کی جیل سے رہا ہوکر ممبئی آئے اور میٹنگ کرکے آزادی ہند کا قائد گاندھی جی کو بنایا اور اسی موقع پر مولانا عبدالباری فرنگی محلی نے گاندھی جی کو مہاتما گاندھی کا خطاب دیا، گویا کہ گاندھی جی کو مہاتما کا خطاب بھی مسلمانوں نے دیا۔ انہوں نے کہا کہ آج بھی جمعیۃ علماء ہند کے کارکنان اور خدام ملک کے گوشے گوشے میں ملک و ملت کے لیے کارہائے نمایاں انجام دے رہے ہیں، جمعیۃ علماء نے یہ سبق دیا ہے کہ جس طرح دین کا تحفظ ہمارے لیے ضروری ہے اسی طرح ہندوستان کے آئین کی حفاظت اور جمہوریت کی بقا بھی ہمارے لیے ضروری ہے۔ مولانا الیاس مخلص نے تمام لوگوں سے اپیل کی ہے کہ پٹنہ کے گاندھی میدان میں مولانا ارشد مدنی کی سرپرستی میں ۵۲/ فروری کو جو جلسہ عام ہورہا ہے اس میں زیادہ سے زیادہ تعداد میں شریک ہوں۔