دبئی: متحدہ عرب امارات کی اعلٰی کونسل نے شیخ محمد بن زاید کو ملک کا صدر منتخب کرلیا ہے۔ سرکاری نیوز ایجنسی کے مطابق شیخ خلیفہ بن زاید کی وفات کے بعد اعلٰی کونسل کے اجلاس میں شیخ محمد بن زاید کو صدر کا عہدہ دینے پر اتفاق ہوا ہے۔
واضح رہے کہ متحدہ عرب امارات کے صدر شیخ خلیفہ بن زاید ال نہیان جمعے کو73 برس کی عمر میں انتقال کرگئے تھے۔ شیخ خلیفہ بن زاید ال نہیان کو جمعے کو ہی ابوظبی کے البطین قبرستان میں سپرد خاک کردیا گیا۔
ابوظبی کی شیخ سلطان بن زاید مسجد میں نماز جنازہ ادا کی گئی جس میں ابوظبی کے ولی عہد شیخ محمد بن زاید اور ال نہیان فیملی کے ارکان نے شرکت کی تھی۔ صدارتی امور کی وزارت نے شیخ خلیفہ بن زاید ال نہیان کے انتقال پر 40 روزہ سرکاری سوگ کا اعلان کررکھا ہے۔
شیخ محمد بن زاید نے 2 نومبر 2004 کو متحدہ عرب امارات کے دوسرے صدر کی حیثیت سے عہدہ سنبھالا اور ابوظبی کے 16 ویں حکمران کے طور پر اپنے والد شیخ زاید بن سلطان ال نہیان کی جگہ سنبھالی تھی۔ وہ 7 ستمبر 1948 کو العین شہر میں پیدا ہوئے تھے اور اپنے بھائیوں میں سب سے بڑے تھے۔
شیخ خلیفہ کے انتقال پر ابوظبی کے اس وقت کے ولی عہد اور موجودہ صدر محمد بن زاید ال نہیان نے افسوس کا اظہار کرتے ہوئے کہا تھا کہ ’متحدہ عرب امارات نے ایک صالح بیٹا اور قائد کھو دیا ہے۔‘ ان کا مزید کہنا تھا کہ ’امارات نے ایک نیک بیٹے اور بااختیار بنانے کا سفر جاری رکھنے والے ایک معتمد قائد کو کھو دیا ہے۔‘
محمد بن زاید ال نہیان کے مطابق ’شیخ خلیفہ بن زاید ال نہیان کے کارنامے، حکمت، سخاوت اور دوسری بہت سی خصوصیات ملک کے کونے کونے تک پھیلی ہوئی ہیں۔ میرے بھائی خلیفہ بن زاید، اللہ آپ پر رحم کرے اور جنت میں جگہ دے۔‘ (ایجنسی )
